Disgwyl newyddion da yn y Cae Ras
Mae clwb pêl-droed Wrecsam wedi cyhoeddi bod dyled dreth y clwb wedi ei chlirio am y tro.
Fe gadarnhaodd Ysgrifennydd y Clwb, Geraint Parry, wrth Golwg360 bod £200,000 wedi gadael y Cae Ras heddiw.
Erbyn cynnal cynhadledd i’r wasg y prynhawn yma, fe ddaeth cadarnhad ei fod wedi cyrraedd banc yr Adran Gyllid a Thollaua’u bod nwhthau’nrhoi’r gorau am y tro i geisio dirwyn y clwb i ben.
Gêmau ail gyfle
Mae hynny’n golygu y bydd Wrecsam yn gallu aros yn y gêmau ail gyfle ar ddiwedd tymor cynghrair y Blue Square.
Yn ôl Geraint Parry, y pecyn ariannol oedd y benthyciad yr oedd un o Is-lywyddion y clwb, John Marek, wedi bod yn ei drafod.
Heb yr arian yn llawn, fe fyddai’r Adran Gyllid wedi gwthio Wrecsam i ddwylo’r gweinyddwyr a hynny’n golygu eu bod yn cael eu hatal rhag chwarae yn y gêmau ail gyfle a’r posibilrwydd o ennill tua £1 miliwn wrth gael dyrchafiad.
Agos
Dros nos, y gred oedd fod y pecyn achub yn agos ond bod angen ychydig o waith eto i benderfynu ar y manylion.
Yn y cyfamser, mae Ymddiriedolaeth Cefnogwyr Wrecsam yn parhau gyda’u bwriad i geisio prynu’r clwb ac maen nhw wedi cyhoeddi rhestr o bump o egwyddorion i sicrhau ei ddyfodol.
Mae’r rheiny’n cynnwys cymryd agwedd realistig at incwm a maint tyrfaoedd a chefnogi aelodau o’r cefnogwyr a chyn reolwr ar fwrdd y clwb.
