Yws Gwynedd Llun: Twitter
Mae Sesiwn Fawr Dolgellau bellach wedi cyhoeddi y bydd Yws Gwynedd, Mynediad am Ddim, Cowbois Rhos Botwnnog, Ail Symudiad a Brigyn yn perfformio yn yr ŵyl ganol fis nesaf.
Yn ymuno â nhw mae bandiau o bob cwr o’r byd gan gynnwys Ghazalaw, sef prosiect ar y cyd rhwng Gwyneth Glyn a’r canwr o India, Tauseef Akhtar.
Fe fydd hefyd perfformiadau gan The Elephant Sessions o’r Alban, The Changing Room o Gernyw a’r grŵp gwerin The Sidh o’r Eidal.
Bydd Magi Tudur, Y Cledrau a myfyrwyr Coleg Meirion Dwyfor hefyd yn cynnal setiau acwstig.
“Rydan ni wedi denu bandiau o bob cwr o’r byd, heb sôn am enwau mawr o Gymru,” meddai Dafydd Hughes, Swyddog Marchnata’r ŵyl.
Digwyddiadau eraill
Ychwanegodd Dafydd Hughes fod un enw arall i’w ddatgelu o ran perfformwyr yn nes at yr amser, “ac mae’n sicr o blesio cynulleidfa.”
Ymhlith y digwyddiadau eraill, fe fydd taith lenyddol gan Bethan Gwanas, sgwrs gan Arwel Rocet am yr arbenigwr canu gwerin, Merêd, gweithdy comedi i blant gan Daniel Glyn a sesiwn bobi gan Elliw Gwawr
Sesiwn Fawr Dolgellau 15-17 Gorffennaf.
