Malcolm Walker
Mae pennaeth un o gwmnïau mwyaf Cymru wedi rhybuddio y byddai cannoedd o swyddi mewn peryg os na fyddai’r Ceidwadwyr yn ennill yr etholiad cyffredinol ymhen pythefnos.
Yn ôl Prif Weithredwr cwmni Iceland Malcolm Walker, byddai newid cyfeiriad gwleidyddol ar ôl y 7fed o Fai yn “rhoi’r hyn sydd wedi ei gyflawni o ran twf yr economi mewn peryg”.
Mae pennaeth Iceland – sydd â’i bencadlys yng Nglannau Dyfrdwy yn Sir y Fflint – yn un o 100 o arweinwyr busnes sydd wedi arwyddo llythyr agored yn gynharach y mis hwn yn cefnogi polisïau Ceidwadol.
Deall anghenion
Dywedodd Malcolm Walker bod angen i Lywodraeth Prydain “ddeall a chefnogi anghenion busnesau, darparu sefydlogrwydd economaidd, rhoi twf wrth galon ei chynlluniau a chreu amgylchiadau i helpu busnesau i ffynnu – fel trethi is”.
“Rwy’n credu bod troi cefn ar yr hyn rydym wedi gweithio tuag ato dros y bum mlynedd ddiwetha’ yn gamgymeriad,” ychwanegodd.
Fe fydd pennaeth Iceland yn cwrdd ag Ysgrifennydd Cymru Stephen Crabb yn ddiweddarach heddiw.
‘Cynllun gwell’
Yn ymateb i’r sylwadau, dywedodd llefarydd ar ran y Blaid Lafur bod ganddyn nhw “gynllun gwell”.
“Mae cyflogau wedi syrthio ac mae biliau trydan wedi codi, felly nid yw’r rhan fwyaf o deuluoedd yn gweld cynnydd.
“Mae gan Lafur gynllun gwell – rydym yn gwybod bod llwyddiant ymysg pobol sy’n gweithio yn golygu llwyddiant i Brydain a Chymru hefyd.”
