Nigel Owens yn canmol dyn wedi neges homoffobig

Mae’r dyfarnwr rygbi Nigel Owens wedi canmol dyn anfonodd neges homoffobig ato ar Twitter am gynnig ymddiheuriad.

Dywedodd Owens wrth raglen Sunday Supplement BBC Radio Wales ei fod yn gobeithio y gall y dyn o Gynwyl Elfed yn Sir Gâr symud ymlaen â’i fywyd yn dilyn y digwyddiad.

Cafodd ymchwiliad ei gynnal gan Heddlu Dyfed-Powys yn dilyn llu o gwynion gan y cyhoedd.

Ond ymddiheurodd James wrth y dyfarnwr yng ngorsaf heddlu Caerfyrddin yr wythnos diwethaf.

Dywedodd Nigel Owens: “Mae’n cymryd dyn go iawn i ddweud eich bod yn flin ac i wneud hynny a gwneud hynny’n gyhoeddus, mae’n anfon neges gref allan.

“Rwy’n credu mai’r neges bwysig yma yw fod rhaid canmol pobol sydd wir yn flin am eu gweithredoedd a derbyn fod yr hyn wnaethon nhw’n anghywir ac yn gamgymeriad.

“Yna gallwn ni gyd symud ymlaen ac maen nhw a phobol eraill yn gwella fel pobol o ganlyniad.”