Y Cynghorydd Sion Jones
Mae’r Cynghorydd Sion Jones wedi cael ei ddewis yn swyddogol dros y penwythnos fel ymgeisydd y Blaid Lafur dros etholaeth Arfon yn etholiadau’r Cynulliad Cenedlaethol.
Roedd swyddfa cangen Arfon Llafur eisoes wedi cadarnhau mai’r Cynghorydd Sir ar Gyngor Gwynedd dros ward Bethel a Llanddeiniolen oedd yr unig un oedd wedi ceisio am yr enwebiad.
Yn dilyn y cyhoeddiad, dywedodd y Cynghorydd Sion Jones: “Dw i’n benderfynol i weithio gyda phawb yn Arfon i wella’r ardal, mae gennyf nod i sicrhau bod y sector breifat yn Arfon yn datblygu, ac erbyn 2020, os caf fy ethol, dw i’n dymuno gweld y sector breifat mor gryf â’r sector gyhoeddus.”
Mae’n awyddus i sicrhau fod yr economi leol yn cael ei datblygu.
“Dw am i bobl ifanc aros yma i weithio, dechrau teulu, prynu tai a hybu ein heconomi yn lleol, ac yn bwysicach – i ddatblygu’r iaith Gymraeg.”
‘Cydweithio’
Yn ôl y Cyng Sion Jones: “Dw i’n dymuno gweithio gyda phawb, dw i eisiau gweld pob cymuned drwy Arfon yn ffynnu. Rwy’n awyddus i weithio gyda phob cynghorydd a grwpiau cymunedol i ddatblygu eu cymunedau.”
Mae’n credu hefyd fod angen newid trywydd gwleidyddol Arfon: “Mae’n bryd i gael newid yn Arfon, ac fe fydda’i yn rhoi’r opsiwn i bobl Arfon y tro hwn am newid, i osod agenda ac uchelgais newydd a ffres i’r ardal.
“Tydi chwarae gwleidyddiaeth ddim o ddiddordeb i mi, dw i’n dymuno gweithio gyda phawb i adeiladu gwell cymdeithas ac ardal.”
