Ole Gunnar Solskjaer
Mae disgwyl cadarnhad heddiw mai Ole Gunnar Solskjaer fydd rheolwr newydd clwb pêl-droed Caerdydd.
Fe wnaeth cyn ymosodwr Manchester United hedfan i Lundain ar Ddydd Calan i gyfarfod perchennog y clwb Vincent Tan pan oedd Caerdydd yn chwarae yn erbyn Arsenal yn Stadiwm Emirates.
Ar hyn o bryd, mae Solskjaer yn rheolwr ar glwb Molde yn Norwy lle mae wedi cael cyfnod llwyddiannus yn arwain y clwb at ddwy bencampwriaeth.
Mae’n debyg bod y rheolwr wedi gwrthod y cyfle i reoli Aston Villa cyn i Paul Lambert gael ei benodi ac mae wedi cael ei gysylltu gyda swydd rheolwr West Brom hefyd.
Fodd bynnag, yn gynharach yr wythnos hon awgrymwyd bod gan Solskjaer amheuon ynglŷn â chymryd y swydd oherwydd y dadleuon a gafodd Vincent Tan gyda’r cyn rheolwr Malky Mackay dros y misoedd diwethaf.
