Ole Gunnar Solskjaer - ar ei ffordd i Gaerdydd?
Mae’r sïon yn dew mai Ole Gunnar Solskjaer fydd rheolwr newydd clwb pêl-droed Caerdydd.
Fe ddaw hyn yn dilyn adroddiadau yn Norwy fod y cyn-ymosodwr Manchester United wedi cytuno i olynu Malky Mackay. Ar hyn o bryd, mae Solskjaer yn rheolwr ar glwb Molde yn y wlad honno.
Yn gynharach yr wythnos hon, roedd sylwebwyr yn dweud fod Solskjaer yn nerfus iawn ynglyn â dod i’r brifddinas, a hynny oherwydd y modd yr oedd perchennog y clwb, Vincent Tan, wedi trin y cyn-reolwr, Malky Mackay, dros y misoedd diwetha’.
Ond y gred ydi fod cadeirydd y clwb, Mehmet Dalman, wedi llwyddo i ddenu’r rheolwr newydd gydag addewid o arian i’w wario ar chwaraewyr newydd yn ystod y mis hwn.
