Seren Burton i ddisgleirio yn Hollywood

Richard Burton
Fe fydd seren i nodi cyfraniad Richard Burton i’r diwydiant ffilm yn cael ei dadorchuddio yn Hollywood heno.

Mae’r seren wedi’i gosod wrth ymyl seren ei gyn-wraig Elizabeth Taylor.

Bu’r pâr yn briod ddwy waith.

Bydd aelodau’r ddau deulu yn bresennol ar gyfer y seremoni sy’n dechrau heno am 7.30pm.

Cleopatra

Yr actor Cymreig, Michael Sheen yw un o’r gwesteion arbennig ar gyfer yr achlysur sy’n nodi hanner canrif ers i Burton a Taylor ymddangos yn y ffilm Cleopatra gyda’i gilydd.

Ar set y ffilm honno y gwnaeth y ddau gwrdd.

Mae’r ffilm yn cael ei hail-ryddhau gan 20^th Century Fox eleni.

Cafwyd ymgyrch yn y blynyddoedd diwethaf gan bapur newydd y Western Mail i osod seren ar gyfer Richard Burton, oedd yn hanu o Bontrhydyfen.

Cafodd Richard Burton ei enwebu ar gyfer saith Oscar yn ystod ei yrfa heb iddo ennill yr un.