Cyllid Cymru’n buddsoddi mewn bwyty Eidaleg ei naws

Tîm Porro
Mae dau gogydd sy’n rhedeg bwyty yn Llandaf wedi derbyn buddsoddiad chwe ffigur gan Cyllid Cymru er mwyn agor ail fwyty yn y brifddinas.

Fe agorodd tîm Porro eu bwyty cynta’ yn Llandaf yn 2015. Bydd bwyty Porro ar Heol Wellfield yn y Rhath yn agor heddiw, diolch i’r buddsoddiad gan Cyllid Cymru. A’r gobaith yw y bydd yn creu naw o swyddi llawn amser newydd sbon.

Mae’r cogyddion, Tom Furlong a Gwyn Myring, yn angerddol am weini bwyd lleol sydd wedi’i ysbrydoli gan yr Eidal.

“Rydyn ni’n defnyddio cynhwysion ffres, lleol o Gymru ym mhob un o’n prydau, ac mae hyn yn cadw ein milltiroedd bwyd yn isel a’r ansawdd yn uchel,” meddai Gwyn Myring sy’n gogydd ac yn gyd-berchennog Porro.