Mae deg o weithwyr addysg proffesiynol o bob rhan o Gymru wedi’u datgelu fel enillwyr pumed Gwobrau Addysgu Proffesiynol Cymru.
Eleni am y tro cyntaf, cyflwynwyd Gwobr Betty Campbell MBE am hyrwyddo cyfraniadau a safbwyntiau cymunedau du, Asiaidd a lleiafrifoedd ethnig.
Mae’r wobr, a enillwyd gan Ysgol Uwchradd Llanwern yng Nghasnewydd, yn cael ei rhoi i unigolyn, tîm neu ysgol sydd wedi dangos ymwybyddiaeth ragorol o bwysigrwydd amrywiaeth a chynhwysiant yn yr ystafell ddosbarth.
Roedd y beirniaid wedi’u plesio’n arbennig gan ddull ysgol gyfan yr ysgol o hyrwyddo amrywiaeth.
Daw hyn cyn i’r cwricwlwm newydd, a fydd yn ei gwneud hi’n orfodol dysgu am hanesion a phrofiadau pobol ddu, Asiaidd ac ethnig lleiafrifol mewn ysgolion, ddechrau cael ei gyflwyno ym mis Medi.
‘Creu ysgol gynhwysol’
Dywedodd Tracey Jarvis o Ysgol Uwchradd Llanwern: “Rydym yn hynod falch o fod yr ysgol gyntaf i dderbyn y wobr hon i gydnabod y gwaith rydym yn ei wneud i greu ysgol gynhwysol.
“Diolch i’n staff, llywodraethwyr, dysgwyr, rhieni a gofalwyr am eu hymrwymiad i ddathlu amrywiaeth, sydd wedi’i wreiddio’n yn ein diwylliant o ddydd i ddydd.”
Dywedodd y Gweinidog dros Addysg a’r Gymraeg, Jeremy Miles: “Mae safon yr enwebiadau eleni, fel erioed, wedi bod yn rhagorol ac yn dangos y doreth o dalent addysgu sydd gennym yma yng Nghymru.
“Mae wedi bod yn arbennig o braf gweld Gwobr gyntaf Betty Campbell MBE yn cael ei chyflwyno, cyn i’r Cwricwlwm newydd gael ei addysgu o fis Medi.”
‘Gall breuddwydion ddod yn wir’
Ymysg yr enillwyr y gwobrau eraill roedd Meurig Jones, Pennaeth Ysgol Uwchradd Llangynwyd, Maesteg a enillodd y wobr ar gyfer Pennaeth y Flwyddyn.
“Brwydrodd fy rhieni dros addysg Gymraeg i mi, ac mae’r wobr hon yn profi y gall breuddwydion ddod yn wir,” meddai.
“Mae’n fraint bod yn bennaeth ac mae’r wobr hon i bawb sy’n cyfrannu at lwyddiant ein hysgol, o’n dysgwyr, rhieni a gofalwyr i’n llywodraethwyr a’n staff anhygoel.
“Byddaf yn parhau i hyrwyddo addysg cyfrwng Cymraeg ac yn gwneud popeth o fewn fy ngallu i sicrhau bod pob plentyn yn cael mynediad a dewis o ran eu taith addysg.”
Enillwyr Gwobrau Addysgu Proffesiynol Cymru 2022:
Athro’r Flwyddyn mewn Ysgol Gynradd
Charmaine Riley, Ysgol Gynradd Radyr, Radyr
Athro Newydd Eithriadol
Holly Gordon, Ysgol Bryn Derw, Casnewydd
Defnydd Ysbrydoledig o’r Gymraeg
Iona Llŷr, Addysg a Gwasanaethau Plant – Cyngor Sir Caerfyrddin
Cefnogi Athrawon a Dysgwyr
Carolyn Platt, Ysgol Bryn Elian, Bae Colwyn
Gwaith Ieuenctid mewn Ysgolion a’r Gymuned
Christian Williams, Ysgol Gyfun Heolddu, Caerffili
Athro’r Flwyddyn mewn Ysgol Uwchradd
Mark Morgan, Ysgol Uwchradd Pen y Dre, Merthyr Tudful
Rheolwr Busnes/Bwrsar Ysgol
Claire Coakley, Ysgol Martin Sant, Caerffili
Pennaeth y Flwyddyn
Meurig Jones, Ysgol Gyfun Gymraeg Llangynwyd, Maesteg
Gwobr Disgybl (neu Ddisgyblion) am yr Athro Gorau
Laura Buffee, Ysgol Uwchradd WRh Hwlffordd, Hwlffordd
Gwobr Betty Campbell MBE am hyrwyddo cyfraniadau a safbwyntiau Cymunedau Du, Asiaidd a Lleiafrifoedd Ethnig
Ysgol Uwchradd Llanwern, Casnewydd
