Mae lladron yn targedu ceir Ford Fiesta ar hyd a lled Cymru oherwydd eu system awtomatig i agor drysau heb angen allwedd.
Dywedir fod y lladron yn cymeryd mantais o’r sefyllfa hefyd i ddwyn darnau o’r ceir.
Mae Heddlu’r De nawr wedi cyhoeddi rhybudd i yrrwyr ar sut y gallan nhw ddiogelu eu hunain.
Rhai o’r llefydd ble mae’r lladron wedi bod wrthi yw meysydd parcio staff ysbytai, ble mae nhw yn gwybod y bydd y perchnogion yn gadael eu ceir am gryn amser.
Dros y chwe mis diwethaf mae naw o geir a barciwyd y tu allan i ysbytai Singleton a Threforys yn Abertawe ag ysbyty Tywysoges Cymru ym Mhenybont-ar-Ogwr wedi cael eu dwyn – yng ngolau dydd – gyda saith ohonyn nhw yn Ford Fiestas.
Yn ystod yr un cyfnod dygwyd paneli o gyrff naw Fiesta arall yn ogystal â darnau eraill tra roedden nhw wedi’u parcio mewn meysydd parcio ysbytai.
Ymhlith y ceir a dargedwyd oedd ceir yn perthyn i’r ysbytai eu hunain.
Cafodd un o’r digwyddiadau ei ffilmio ar gamerau cylch cyfyng.
Credir fod y lladron yn gwisgo helmedau beiciau modur i guddio eu hwynebau.
Mae Heddlu’r De yn awgrymu y dyle perchnogion ceir nawr ddefnyddio cloeon ar eu olwynion llywio yn ogystal â sicrhau nad oes modd i ladron ddenfyddio eu hallweddi mewn unrhyw fodd.
