Warren Gatland
Warren Gatland fydd yn hyfforddi’r Llewod ar eu taith i Awstralia flwyddyn nesaf yn dilyn datganiad swyddogol y bore ma.
Cafodd cynhadledd newyddion ei drefnu gan y Llewod am 11yb heddiw.
Roedd disgwyl i’r Llewod gyhoeddi’r apwyntiad nôl ym mis Ebrill ond cafodd ei ohirio yn dilyn damwain i Warren Gatland pan dorrodd ei ddau bigwrn yn dilyn cwymp yn ei gartref yn Waikato.
Hyfforddwr Cymru oedd y ffefryn i gymryd y swydd yn dilyn ei lwyddiant gyda’r tîm cenedlaethol dros y deuddeg mis diwethaf.
Arweiniodd Gymru i rownd gynderfynol Cwpan y Byd ac yna arwain y tîm at ei hail Gamp Lawn mewn pedair blynedd.
Rob Howley i Gymru?
Disgwylir i’r gŵr 48 oed o Seland Newydd enwi ei dîm hyfforddi ym mis Hydref.
Y disgwyl yw y bydd nifer o dîm hyfforddi Cymru’n cael eu cynnwys yn y staff, gan gynnwys yr hyfforddwr amddiffyn, Shaun Edwards.
Golygai hynny y bydd Cymru’n gorfod ymdopi heb ei brif hyfforddwyr am bron i flwyddyn gyfan.
Er y bydd disgwyl i Warren Gatland hyfforddi Cymru yn ystod gemau’r hydref yn erbyn Seland Newydd ac Awstralia, mae disgwyl i Rob Howley gymryd yr awenau yn ystod Pencampwriaeth y Chwe Gwlad.
Dydi’r Llewod heb ennill cyfres brawf ers ei hymweliad i Dde Affrica yn 1997.
