Jason Eaton (llun o wefan yr Hurricanes)
Mae yna adroddiadau heddiw’n cysylltu’r Sgarlets gyda chwaraewr ail reng Seland Newydd, Jason Eaton.
Mae’r Sgarlets yn brin o brofiad a niferoedd yn yr ail reng ar ol colli Dominic Day, Lou Reed a Damian Welch sydd wedi gadael ar ddiwedd y tymor.
Maent eisoes wedi sicrhau llofnod y clo o Dde Affrica, George Earle ac yn awyddus i ychwanegu enw amlwg arall i’r adran mae’n debyg.
Ar hyn o bryd, mae Eaton yn chwarae ei rygbi gyda’r Hurricanes yn y Super 15 ond yn ôl y South Wales Evening Post fe allai gael ei ddenu i Orllewin Cymru.
Mae Eaton yn 29 oed ac yn 6 troedfedd ac 8 modfedd mewn taldra.
Enillodd 15 o gapiau dros y Crysau Duon, y diweddaraf yn erbyn Cymru yng Nghaerdydd yn 2009.
Yn ôl yr Evening Post, mae’r rhanbarth hefyd yn targedu’r prop i Seland Newydd, Campbell Johnstone, sy’n chwarae yn Ffrainc gyda Biarritz ar hyn o bryd.
