Nigel Davies

Aled Evans sy’n adolygu gêm gyntaf y Scarlets yng nghyngrair Pro12…

Sicrhaodd y Scarlets fuddugoliaeth gyntaf y tymor o 32 pwynt i 9 yn erbyn yr Eidalwyr o Aironi ar brynhawn gwlyb ym Mharc y Scarlets.

Rhys Thomas ac Andy Fenby sgoriodd y ceisiadau mewn ail hanner a oedd yn llawer gwell ar ôl 40 munud digon difflach.

Roedd troed dde ddibynadwy Dan Newton yn holl bwysig, ac fe fanteisiodd ar ddiffyg disgyblaeth y tîm a orffennodd ar waelod y gynghrair y llynedd.

Ni fydd hwn yn brynhawn a fydd yn aros yn hir yng nghof y chwech mil a mwy o gefnogwyr fu’n bresennol, ond roedd y fuddugoliaeth yn allweddol er mwyn sicrhau dechreuad positif i’r tymor.

Isel oedd safon y chwarae yn yr hanner cyntaf wrth i’r tywydd achosi nifer o gamgymeriadau elfennol gan y ddwy ochor. Aironi aeth ar y blaen yn gynnar yn dilyn un o dair gôl gosb gan Naas Olivier.

Ond bach iawn fu’r bygythiad i amddiffyn y Scarlets. Ni chroesodd Aironi linell dwy ar hugain y cochion yn y pedwar deg munud agoriadol.

Pum munud cyn yr hanner fe dderbyniodd y mewnwr Tito Tebaldi unig garden felen yr ornest, ac yn dilyn cic arall gan Newton roedd y Scarlets ar y blaen o 9 i 6 ar yr egwyl.

Fe gododd y tempo ar ddechrau’r ail hanner wrth i’r blaenwr Rhys Thomas o bawb hawlio cais cyntaf y tymor ym Mharc y Scarlets.

Un o’r wynebau newydd, Aled Thomas, a ddechreuodd y symudiad. Ffugiodd yn ddeallus cyn darganfod y bachwr Emyr Phillips ar yr asgell. Yn dilyn rhuthr nodweddiadol arall gan Ben Morgan yng nghanol y cae, ailgylchwyd y bêl yn gyflym gan alluogi Thomas blymio am y llinell yn y gornel.

Andy Fenby, yr asgellwr, sicrhaodd y fuddugoliaeth. Fe gollodd Fenby’r mwyafrif o’r tymor diwethaf drwy anaf, ond braf oedd ei weld yn rhwygo’r bêl yng nghysgod y pyst cyn llithro dros y llinell gais.

Roedd trosiad Newton yn llwyddiannus gan agor y bwlch rhwng y timau i ugain pwynt. Yr eilydd faswr, Rhys Jones, sgoriodd pwyntiau olaf y gêm gyda chic gosb syml, gan sicrhau fod y Scarlets yn ymuno a’r Gweilch a’r Gleision ar frig y tabl.

Fe fydd y garfan yn teithio i Iwerddon y penwythnos nesaf i herio Connacht. Ni fydd hon yn gêm hawdd gan iddynt hwythau ennill oddi cartref yn erbyn Treviso ar benwythnos cyntaf y tymor.