Ryan Jones
Wedi colli tair gêm daeth gobeithion y Gweilch i ben yng nghystadleuaeth y Cwpan Heineken. O ganlyniad mae’r prif hyfforddwr Steve Tandy wedi penderfynu gorffwys y capten Alun Wyn Jones.
Y chwaraewr rhyngwladol profiadol Ryan Jones fydd yn arwain y tîm yn erbyn Castres heno. Hefyd bydd y maswr ifanc Sam Davies yn dechrau ei gêm gyntaf yn y gystadleuaeth fel cefnwr. Wrth egluro ei reswm dros roi gorffwys i’w gapten dywedodd Tandy ei fod wedi chwarae nifer o gemau caled i’w wlad ac i’r rhanbarth yn ddiweddar, ac y byddai yna gemau pwysig eto i ddod ddechrau’r flwyddyn.
Mae’r hyfforddwr yn gobeithio y bydd ei dîm yn medru ennill heno ar ôl colli 15-9 iddyn nhw nos Wener ddiwethaf.
‘‘Yr oedd yn gêm galed allan yn Castres y penwythnos diwethaf,” meddai Steve Tandy.
“Er ein bod yn siomedig iawn o gipio un pwynt yn unig , fe ddaeth yna rai pethau da o’r gêm. Yr oedd yn braf iawn gweld nifer o chwaraewyr ifanc dibrofiad yn gwneud yn dda. Mae llawer o’r pethau da a welsom yn y gêm wedi codi’r hyder ar gyfer yr wythnos hon.”
