Joe Allen
Mae rheolwr Abertawe wedi gwrthod unrhyw ymholiadau ynglŷn â gwerthu Joe Allen i Lerpwl am £10 miliwn.
Awgrymodd adroddiadau ddoe bod gan Brendan Rodgers ddiddordeb mewn dod â’r Cymro i Anfield, er iddo gytuno i beidio â gwneud cais am unrhyw un o sêr y clwb yn ystod y 12 mis nesaf.
Ond mae Michael Laudrup yn mynnu na fu unrhyw gyswllt o gyfeiriad Lerpwl am y chwaraewr 22 oed.
Ar hyn o bryd mae Allen yn ymarfer yng ngharfan Prydain ar gyfer y Gemau Olympaidd.
‘‘Nid wyf wedi clywed dim oddi wrth Lerpwl,” meddai Laudrup.
“Os daw i fod yn fwy na sibrydion, bydd yn rhaid i mi siarad gyda’r Cadeirydd ynglŷn â’r peth.”
