Mae Abertawe yn parhau yn ddi guro yn y Liberty yn dilyn perfformiad ail hanner da a buddugoliaeth o 3-1 yn erbyn deg dyn Bolton.

Rhoddodd Joe Allen yr Elyrch ar y blaen yn fuan yn yr ail hanner cyn i Scott Sinclair ddyblu mantais y tîm cartref toc cyn yr awr. A sgoriodd y blaenwr, Danny Graham i’w rwyd ei hun ac yn y pen iawn hefyd wrth iddi orffen yn 3-1.

Yr Hanner Cyntaf

Doedd dim llawer o ddigwydd yn yr hanner cyntaf, dim ond ambell i hanner cyfle i David N’gog a Darren Pratley yn cael eu harbed gan Michel Vorm ac ambell i gynnig o bell gan Abertawe. A digwyddiad mwyaf arwyddocaol yr hanner mae’n debyg oedd cerdyn melyn Ricardo Gardner funud cyn yr egwyl yn dilyn trosedd ar Nathan Dyer.

Dim ond dau funud o’r ail hanner a oedd wedi’i chwarae pan droseddodd Gardner Dyer am yr eildro a derbyn cerdyn melyn arall a cherdyn coch am ei drafferth. Bolton i lawr i ddeg dyn gyda’r mwyafrif o’r hanner ar ôl.

A manteisiodd Abertawe yn syth, dim ond pedwar munud o’r ail hanner oedd wedi pasio pan agorodd Allen y sgorio o ochr y blwch cosbi ar ôl derbyn y bêl gan Mark Gower.

Abertawe oedd y tîm cryfaf yn awr ac arbedodd Jussi Jaaskelainen gynigion gan Dyer a Sinclair cyn i gyn arwr yr Elyrch, Darren Pratley lorio Angel Rangel yn y bocs i roi cyfle o’r smotyn i’r tîm cartref. Cymerodd Sinclair y gic gan sgorio’n daclus, ei drydedd cic o’r smotyn llwyddiannus ar y Liberty y tymor hwn, 2-0 i Abertawe wedi 57 munud.

Dwy Gôl Graham

Cafodd Sinclair ac Allen gyfleoedd i sgorio’r drydedd ond methodd y ddau a tharo’r targed, ac yn wir, Bolton a sgoriodd y gôl nesaf. Graham yn llwyddo i roi’r bêl yn ei rwyd ei hun yn dilyn croesiad Chris Eagles. Dyma’r gôl gyntaf i’r tîm o Gymru ei hildio ar y Liberty y tymor hwn.

Ond Abertawe oedd y tîm cryfaf o hyd a chafodd Sinclair gyfleoedd i sicrhau’r fuddugoliaeth cyn i Graham wneud hynny wedi dau funud o amser a ganiateir am anafiadau ar ddiwedd y gêm. Daeth Rangel o hyd i’r ymosodwr yn y blwch cosbi a gwnaeth Graham yn iawn am ei gamgymeriad cynharach trwy sgorio yn y pen iawn y tro hwn a sicrhau’r tri phwynt i Abertawe.

A thri phwynt holl bwysig ydyw hefyd, tri phwynt sydd yn codi’r Elyrch i hanner uchaf y tabl. Diolch i ganlyniad gwych arall ar y Liberty maent bellach yn y degfed safle, tan yfory pryn bynnag.