Wrecsam a Chasnewydd i ail chwarae wedi gêm ddi-sgôr

Wrecsam 0–0 Casnewydd                                                               

Bydd yn rhaid i Wrecsam a Chasnewydd ail chwarae eu gêm yn ail rownd y Cwpan FA yn dilyn gêm gyfartal ddi-sgôr ar y Cae Ras nos Sadwrn.

Bydd y ddau dîm o Gymru’n wynebu ei gilydd eto ar Rodney Parade ar nos Fawrth, yr unfed ar ddeg o Ragfyr.

Doedd dim golwg o Sam Ricketts ar ochr y cae wrth i adroddiadau’n cysylltu rheolwr Wrecsam â swydd wag yn Amwythig barhau.

Y tîm cartref a gafodd y gorau o’r cyfleoedd serch hynny. Gwnaeth Joe Day arbediad da i atal ergyd gadarn Bobby Grant yn yr hanner cyntaf a gwnaeth Mickey Demetriou yn wych i glirio cynnig Stuart Beavon oddi ar y llinell yn yr ail.

Antoine Semenyo a gafodd gyfle gorau’r ymwelwyr ond peniodd dros y trawst o chwe llath.

Bydd yn rhaid aros ychydig dros wythnos felly i weld pa dîm fydd yn cyrraedd y drydedd rownd ond mae’n ymddangos yn gynyddol annhebygol mai Ricketts a fydd wrth y llyw erbyn hynny.

.

Wrecsam

Tîm: Lainton, Roberts, Lawlor, Pearson, Carrington, Walker, Wright (Young 63’), Summerfield, Rutherford (Jennings 77’), Grant, Beavon (Fondop-Talom 85’)

Cerdyn Melyn: Walker 65’

.

Casnewydd

Tîm: Day, Franks, O’Brien, Demetriou, Pipe, Crofts, Bakinson, Butler, Sheehan, Amond (Harris 90+2’), Matt (Semenyo 75’)

Cardiau Melyn: Sheehan 39’, O’Brien 86’

.

Torf: 5,295