Dylai Uwch Gynghrair Lloegr gyflwyno dyfarnwyr fideo, yn ôl rheolwr tîm pêl-droed Southampton, y Cymro Mark Hughes.
Roedd cyn-reolwr Cymru’n grac ar ôl i’r dyfarnwr wrthod rhoi gôl i Charlie Austin, gan ddweud bod Maya Yoshida yn camsefyll wrth i Nathan Redmond groesi’r bêl, er nad oedd e wedi ei chyffwrdd.
Daeth y gêm yn erbyn Watford i ben yn gyfartal 1-1.
Yn dilyn y gêm, roedd Charlie Austin yntau yn grac mewn cyfweliad, gan alw penderfyniad y dyfarnwr Simon Hooper yn “jôc”.
Ond nid Southampton yn unig oedd wedi dioddef, wrth i ymosodwr Watford Nathaniel Chalobah gael ei dynnu i’r llawr yn y cwrt cosbi, ond chawson nhw ddim cic o’r smotyn.
‘Synnu’
“Mae angen iddo ddod i mewn,” meddai Mark Hughes am y defnydd o fideo i helpu dyfarnwyr.
“Ces i fy synnu na wnaethon nhw ei gyflwyno ar ddechrau’r flwyddyn [y tymor], dw i’n credu bod llawer o bobol yn y gêm [wedi cael eu synnu] hefyd.
“Mae llawer o gystadlaethau eraill wedi ei gyflwyno’n gyflym iawn, iawn.
“Mae gan yr holl brif gampau adolygiadau fideo ac am ryw reswm, mae’r Uwch Gynghrair, sy’n cael ei gwylio o amgylch y byd, yn dal i fod yn yr oesoedd tywyll.”
