Mae rheolwr tîm pêl-droed Abertawe, Carlos Carvalhal wedi galw am gynnal y momentwm wrth iddyn nhw deithio i West Brom ar gyfer gêm bwysig yn Uwch Gynghrair Lloegr heddiw (3 o’r gloch).
Roedd perfformiad yr Elyrch yn yr ail hanner yn erbyn Man U yn Old Trafford wythnos yn ôl yn addawol, er iddyn nhw golli o 2-0.
Mae West Brom yn y gwaelodion, ddeg pwynt i ffwrdd o’r safleoedd diogel, ac mae Darren Moore yng ngofal y tîm ar ôl i’r rheolwr Alan Pardew gael ei ddiswyddo.
Byddai buddugoliaeth i’r Elyrch, sy’n bymthegfed yn y tabl, yn gam mawr ymlaen yn eu brwydr i osgoi disgyn i’r Bencampwriaeth.
Dywedodd Carlos Carvalhal: “Fe lwyddon ni i gael momentwm yn yr ail hanner ym Manchester United ac mae’n fan cychwyn da ar gyfer y gêm hon.
“Fe gawson ni ail hanner da iawn, fe wnaethon ni gyflawni rhywbeth yn y ffordd wnaethon ni chwarae ac ar ddydd Sadwrn, rydyn ni eisiau perfformiad tebyg er mwyn ennill pwyntiau.
“Mae gyda ni lwybr hir i aros yn yr Uwch Gynghrair, a bydd yr holl dimau’n anodd. Mae gyda ni saith gêm yn weddill ac rydyn ni’n gwybod ar ôl y gêm hon fod gyda ni bedair gêm gartref a dwy gêm oddi cartref.”
Ychwanegodd: “All neb ganu cyn y chwiban olaf. Allwch chi ddim canu cyn bod pethau ar ben, neu fe fyddwch chi yn yr awyr â’ch cefn at y llawr.”
Y timau
Mae disgwyl i’r chwaraewr canol cae Sam Clucas ddychwelyd i dîm Abertawe ar ôl anafu ei ben-glin.
Mae Renato Sanches ac Angel Rangel, y capten, allan o hyd, ac mae Jordan Ayew wedi’i wahardd o hyd.
Mae Nacer Chadli a Daniel Sturridge allan o hyd i West Brom. Mae disgwyl i Gareth Barry fod allan am weddill y tymor yn dilyn llawdriniaeth ar ei ben-glin.
