Ewro 2016: Dwy gêm gyntaf Cymru ar y BBC

Tîm Cymru'n dathlu cyrraedd Ewro 2016 (llun: CBDC)
Mae’r BBC wedi cadarnhau mai nhw fydd yn dangos gêm agoriadol Cymru yn Ewro 2016 yn erbyn Slofacia, yn ogystal â’r ornest fawr yn erbyn Lloegr.

ITV fydd yn darlledu gêm grŵp olaf Cymru yn erbyn Rwsia, wrth i’r darlledwyr benderfynu ar eu hamserlen terfynol nhw ar gyfer dangos gemau grŵp y gystadleuaeth.

Mae’r ddau ddarlledwr yn rhannu hawliau darlledu’r bencampwriaeth, ac fe fydd uchafbwyntiau’r holl gemau hefyd yn cael eu dangos gan y ddau.

Ond dyw hi ddim yn glir eto a fydd S4C yn cael hawliau i ddarlledu gemau Cymru ochr yn ochr â’r BBC neu ITV, fel maen nhw’n ei wneud gyda rygbi ym Mhencampwriaeth y Chwe Gwlad a Chwpan y Byd.

“Mae hwn am fod yn haf i’w gofio. Rydyn ni wrth ein bodd ein bod ni’n dangos gêm gyntaf hanesyddol Cymru yn erbyn Slofacia a’r ‘le crunch’ hir ddisgwyliedig yn erbyn Lloegr,” meddai cyfarwyddwr BBC Cymru Rhodri Talfan Davies.

Gêm agoriadol ar ITV

Bydd ITV yn dangos gêm agoriadol y gystadleuaeth rhwng Ffrainc a Rwmania, yn ogystal â’r ddwy arall o gemau Lloegr.

Mae’n debyg eu bod nhw wedi hepgor y cyfle i ddangos gêm Cymru v Lloegr er mai nhw gafodd y dewis cyntaf, oherwydd nad oedd amser y gic gyntaf am 2.00yp yn un cyfleus i geisio denu cynulleidfa fawr.

Ond gan fod ITV yn dangos gêm Lloegr v Slofacia ar yr un pryd a gêm Cymru v Rwsia, mae’n debygol y bydd gêm Cymru’n cael ei symud i ITV4.

Fe fydd ITV hefyd yn dangos dwy o dair gêm grŵp Gweriniaeth Iwerddon, tra bod y BBC yn dangos dwy o dair gêm grŵp Gogledd Iwerddon.

“Fe fydd Ewro 2016 yn dwrnament arbennig iawn, gyda 24 tîm ynddi am y tro cyntaf, yn cael ei chynnal mor agos at adre a chyda thri o wledydd Prydain yn ogystal â Gweriniaeth Iwerddon yn cystadlu,” meddai Cyfarwyddwr Chwaraeon ITV, Niall Sloane.

“Dyw hyn erioed wedi digwydd o’r blaen ac rydyn ni’n edrych ymlaen at gyfleu’r digwyddiadau a’r cyffro o Ffrainc i’r gwylwyr adre.”

Amserlen darlledu gemau grŵp Ewro 2016

Dydd Gwener 10 Mehefin

20.00 (ITV) Ffrainc v Rwmania

Dydd Sadwrn 11 Mehefin

14.00 (BBC) Albania v Swistir

17.00 (BBC ) Cymru v Slofacia

20.00 (ITV) Lloegr v Rwsia

Dydd Sul 12 Mehefin

14.00 (ITV) Twrci v Croatia

17.00 (BBC) Gwlad Pwyl v Gogledd Iwerddon

20.00 (BBC) Yr Almaen v Wcrain