Abertawe 0–1 Chelsea

Braidd yn anlwcus oedd Abertawe i golli yn erbyn Chelsea ar y Liberty brynhawn Sul wrth i Demba Ba sgorio unig gôl y gêm hanner ffordd trwy’r ail hanner.

Chwaraeodd yr Elyrch ran helaeth o’r gêm gyda deg dyn yn dilyn cerdyn coch cynnar Chico Flores ac er iddynt amddiffyn yn arwrol am gyfnod hir fe lwyddodd yr ymwelwyr o Lundain i gipio’r gôl holl bwysig yn y diwedd.

Chelsea a gafodd gyfle da cyntaf y gêm wedi dim ond chwe munud ond tarodd Mohamed Salah ochr allan y postyn gyda chynnig o ddeg llath.

Roedd Abertawe yn llawn cystal tîm yn y chwarter awr agoriadol ac roedd angen arbediad da gan Petr Cech i atal peniad da Wilfred Bony o groesiad Angel Rangel.

Cerdyn Coch

Yna, daeth trobwynt y gêm wedi chwarter awr pan dderbyniodd Chico ail gerdyn melyn mewn dau funud am droseddu André Schürrle ar ochr y cwrt cosbi.

Cafodd Chelsea dipyn mwy o’r meddiant wedi hynny ond llwyddodd amddiffyn yr Elyrch i’w hatal rhag cael yr un cynnig ar y targed yn yr hanner cyntaf. Yn wir, gallai Abertawe fod wedi mynd ar y blaen toc cyn yr egwyl pan wnaeth Cech arbediad da i atal cynnig Nathan Dyer o bellter.

Chwaraewyd mwy a mwy o’r gêm ar gyrion cwrt cosbi Abertawe yn yr ail hanner a chafodd Ba â’i ben a Samuel Eto’o â’i droed gyfleoedd da i agor y sgorio.

Gôl

Fe ddaeth y gôl yn y diwedd union hanner ffordd trwy’r ail gyfnod. Cafodd Ba ei ryddhau gan bas dda Nemanja Matic a gwyrodd ei ergyd oddi ar Ashley Williams ac o dan Michel Vorm i gefn y rhwyd.

Ceisiodd Abertawe eu gorau glas i unioni wedi hynny ond roedd chwarae gyda deg dyn cyhyd wedi cymryd gormod o’u hegni ac fe ddaliodd Chelsea eu gafael ar fuddugoliaeth braidd yn ddi fflach.

Mae’r canlyniad yn cadw Abertawe yn bymthegfed, dri phwynt uwch ben safleoedd y gwymp gyda dim ond pedair gêm ar ôl.

Mae Chelsea ar y llaw arall yn ail, ddau bwynt y tu ôl i Lerpwl ar y brig wedi iddynt hwy drechu Man City o 3-2 yn Anfield yn gynharach brynhawn Sul.

.

Abertawe

Tîm: Vorm, Rangel, Davies, Shelvey, Chico, Williams, Dyer (Ngog 73′), Britton (De Guzmán 86′), Bony, Hernández (Amat 19′), Routledge

Cerdyn Melyn: Chico 14’

Cerdyn Coch: Chico 16’

.

Chelsea

Tîm: Cech, Ivanovic, Azpilicueta, Matic, Cahill, Terry, Salah, Ramires (Oscar 45′), Ba (Mikel 79′), Willian, Schürrle (Eto’o 45′)

Gôl: Ba 68’

Cardiau Melyn: Schürrle 45’, Mikel 86’

.

Torf: 20,761