Andy Murray
Fe fydd ymgyrch Andy Murray i fod yn bencampwr Wimbledon am yr eil dro yn cychwyn ar y Cwrt Canol y prynhawn ‘ma.
Yr Albanwr fydd yn cychwyn y bencampwriaeth mewn gêm yn erbyn David Goffin o Wlad Belg am 1 o’r gloch.
Murray, 27, oedd y Prydeiniwr cyntaf i ennill Wimbledon ers Fred Perry yn 1936 ac mae wedi dweud ei fod yn “barod” ar gyfer y gêm gyntaf ac yn credu y gall ennill y twrnament unwaith eto.
Yn ôl y trefnwyr, mae tocynnau wedi gwerthu “yn gynt nag erioed” eleni.
‘Dwi’n barod’
Mewn cynhadledd i’r wasg ddoe, dywedodd Andy Murray:
“Os dwi’n chwarae’r gorau y galla’ i, fe wnâi roi cyfle i’n hun wneud yn dda. A rhoi fy hun mewn safle i ennill y twrnament.
“Ond allwch chi ddim dechrau’n araf mewn twrnament fel hyn. Mae’n rhaid canolbwyntio o’r cychwyn cyntaf. Ac mi fydda i’n barod.”
