Mae Cymdeithas Bêl Droed Cymru wedi cyhoeddi mai Craig Bellamy fydd rheolwr newydd tîm pêl-droed dynion Cymru.
Mae gan Craig Bellamy brofiad helaeth o hyfforddi yn dilyn cyfnodau gyda Burney. Anderletch a Chaerdydd.
Mae Cymdeithas Bêl Droed Cymru wedi bod yn chwilio am reolwr newydd ers diswyddiad Rob Page fis diwethaf.
Cadarnhaodd y Gymdeithas heddiw [Mawrth 9 Gorffennaf] fod Craig Bellamy wedi arwyddo cytundeb tan 2028.
“Anrhydedd mwyaf fy ngyrfa”
Dywedodd Craig Bellamy mewn datganiad ei fod yn “fraint anhygoel imi gael y cyfle i arwain fy ngwlad a dyma anrhydedd fwyaf fy ngyrfa.
“Fy mreuddwyd erioed oedd dod yn Brif Hyfforddwr Cymru a dw i’n barod am yr her.
“Dwi’n teimlo’n barod am yr her o ddatblygu’r tîm yma er mwyn dod â llwyddiant parhaus i bêl-droed Cymru.
“Dydw i methu aros i ddechrau yn ein gemau Cynghrair y Cenhedloedd ym mis Medi.”
Bu’n cyfarfod swyddogion y Gymdeithas yr wythnos ddiwethaf ac ef wnaeth lwyddo i greu’r arfraff fwyaf yn ystod y trafodaethau hynny.
Roedd yna drafodaethau hefyd gyda chyn-seren Arsenal Thierry Henry, rheolwr Georgia, Willy Sagnol, a rheolwr Oxford United, Des Buckingham.
Nid dyma’r tro cyntaf iddo geisio am y rôl, wedi iddo gael ei gyfweld ar ôl i Chris Coleman adael yn 2017, ond Ryan Giggs a gafodd ei benodi yn rheolwr bryd hynny.
Fel chwaraewr, mae wedi chwarae dros 400 o gemau o safon a chynrychioli ei wlad 78 gwaith gan arwain ei dîm rhwng 2007/10.
Fe dreuliodd gyfnodau gyda Norwich City, Coventry City, Celtic, Blackburn Rovers, Liverpool, West Ham United, Manchester City a Lerpwl cyn gorffen gyda Chaerdydd.
“Pleser”
Dywedodd Dr David Adams, Prif Swyddog Pêl-Droed y Gymdeithas ei fod yn “bleser mawr cyhoeddi Craig fel ein Prif Hyfforddwr newydd.
“Gwnaethom gynnal proses recriwtio manwl a chafodd Craig ei adnabod fel ymgeisydd amlwg.
“Rydym yn edrych ymlaen at gemau Cynghrair y Cenhedloedd a chyd-weithio â Craig i sicrhau llwyddiant i bêl droed Cymru.”
Craig Bellamy fydd yn arwain y tîm yn eu hymgyrch i gyrraedd Cwpan y Byd yn 2026.
Bydd ei gêm gyntaf fel rheolwr yn erbyn Twrci ar 6 Medi yn Stadiwm Dinas Caerdydd yn rhan o Gynghrair y Cenhedloedd.
Bydd Cymru wedyn yn teithio i Montenegro ar 9 Medi.
