Mae Prif Hyfforddwr y Scarlets, Nigel Davies, wedi dweud bod angen i’w dîm sicrhau’r pwyntiau yn y gêm ddarbi yn erbyn y Gweilch yn y Stadiwm Liberty nos yfory.
Ar hyn o bryd y Scarlets yw’r rhanbarth Gymreig isaf yn y Gynghrair Magners ac o ganlyniad i hyn, maen nhw’n wynebu methu’r Cwpan Heineken y tymor nesaf.
“Mae hon yn gêm enfawr i ni ac mae’n rhaid i ni sicrhau’r pwyntiau,” meddai Davies.
“Ond mae hi hefyd yn gêm bwysig i’r Gweilch. Mae’r Gweilch ddeg pwynt ar y blaen i ni, ond os allwn ni ennill yn eu herbyn fe fydd y Gweilch hefyd yn y frwydr i ennill eu lle yn Ewrop.
“Mae’n mynd i fod yn gêm drydanol i’r ddau dîm – fe fydd y pwysau arnyn nhw i sicrhau’r fuddugoliaeth oherwydd eu bod nhw’n chwarae adref ac fe fydd pwysau arnom ni hefyd i gasglu pwyntiau,” ychwanegodd Nigel Davies.
Newyddion y tîm
Mae maswr Cymru a’r Llewod, Stephen Jones yn ôl yn y tîm yn ogystal ag asgellwr yr Alban, Sean Lamont.
Fe fydd Jones a Lamont yn ychwanegu profiad ar adeg holl bwysig gyda dim ond pedair gêm yn weddill yn y Gynghrair Magners.
Mae Nigel Davies wedi penderfynu dewis y chwaraewr ifanc, Tavis Knoyle yn safle’r mewnwr.
Fe fydd bachwr Cymru a’r Llewod, Matthew Rees yn dychwelyd i’r pymtheg cyntaf gyda Ken Owens yn cymryd ei le ar y fainc.
Mae Rhys Priestland yn symud i safle’r cefnwr gyda Daniel Evans ar y fainc.
“Rwy’n hapus gyda’r tîm a fydd yn teithio i’r Liberty ac rwy’n siŵr y cawn weld gêm dda. Mae rhai o’r chwaraewyr mwy profiadol yn ôl ar gyfer y gêm yma ac fe fyddwn ni’n gystadleuol iawn nos Wener,” meddai Prif Hyfforddwr y Scarlets.
Carfan y Scarlets
15 Rhys Priestland, 14 Sean Lamont, 13 Regan King, 12 Jonathan Davies 11 Andy Fenby, 10 Stephen Jones, 9 Tavis Knoyle.
1 Iestyn Thomas, 2 Matthew Rees, 3 Deacon Manu, 4 Lou Reed, 5 Dominic Day, 6 Rob McCusker, 7 Richie Pugh 8 David Lyons.
Eilyddion- 16 Phil John, 17 Ken Owens, 18 Rhys Thomas 19 Damian Welch, 20 Josh Turnbull, 21 Martin Roberts, 22 Daniel Evans.
