Mae Llywodraeth y Swistir wedi cyhoeddi y byddan nhw’n cymryd camau i rwystro pobol rhag dod i’r wlad i ladd eu hunain.
Mae mwy nag 100 o Brydeinwyr gydag afiechydon neu anableddau marwol neu gronig wedi teithio i glinig cwmni Dignitas yn ninas Zurich er mwyn lladd eu hunain.
Ond datgelodd gweinidog cyfiawnder y wlad Eveline Widmer-Schlumpf y byddai’n gorfodi canolfannau sy’n cynnig hunanladdiad i ddilyn canllawiau llymach.
Bydd rhaid i gleifion gael nodyn gan ddau ddoctor yn dweud nad oes modd gwella eu clefyd a’u bod nhw’n debygol o farw’n fuan ohono. A bydd rhaid iddyn nhw brofi
eu bod yn gallu gwneud penderfyniad cyfrifol i ladd eu hunain.
Byddai unrhyw ganolfan sy’n gwrthod yn wynebu achos llys – neu yn cael ei chau yn gyfangwbl.
‘Dim twristiaeth hunan-ladd’
“Fel gwlad does gyda ni ddim diddordeb mewn denu twristiaid sydd eisiau lladd eu hunain,” meddai Eveline Widmer-Schlumpf.
“Fydd hi ddim yn bosib yn y dyfodol i rywun groesi’r ffin a lladd ei hun ychydig ddiwrnodiau’n ddiweddarach gyda help cwmni,” meddai Eveline Widmer-Schlumpf.
Mae’r Llywodraeth yn ystyried gwahardd hunanladdiad cynorthwyol yn gyfan gwbl, ond mae pryderon y byddai hyn yn gorfodi’r busnesau ‘dan ddaear’.
‘Annynol’ – Dignitas yn ymateb
Dywedodd sylfaenydd Dignitas Ludwig Minelli bod cynigion y gweinidog cyfiawnder yn “hen ffasiwn a nawddoglyd”.
“Fe fydd hyn yn hybu hunanladdiadau unig ar draciau trên, o bontydd uchel a thrwy ffyrdd annynol eraill,” meddai.
(Llun: Adeilad Dignitas)
