Mae’n bosib bod y Llywodraeth ar fin cefnu ar eu cynlluniau i wario £20 biliwn ar fersiwn newydd o arfau niwclear Trident.
Mae pôl YouGov gan y blog adain chwith Left Foot Forward yn dangos bod 63% yn erbyn adnewyddu Trident a bod 23% yn credu y dylai Prydain gael gwared ag arfau niwclear yn gyfan gwbl.
Yn ôl papur newydd y Times mae aelodau o’r Cabinet yn credu y bydd yr addewid i adnewyddu Trident yn diflannu o faniffesto etholiad y blaid Lafur y flwyddyn nesaf.
Pwysau
Mae Llywodraeth Prydain dan bwysau i ymuno gyda’r Arlywydd Obama wrth alw am ostyngiad mawr yn nifer yr arfau sydd gan wledydd niwclear y byd.
Yn ogystal â’r gost gychwynnol, mae disgwyl i Trident gostio rhwng £72 biliwn a £97 biliwn tros 20 mlynedd.
Mae disgwyl i’r llongau tanfor Trident presennol, sy’n cynnal 8,000 o swyddi yn yr Alban, barhau ar waith tan 2017.
Mae llywodraeth SNP yr Alban yn gwrthwynebu cadw’r llongau tanfor a’u harfau niwclear yn y wlad.
Arfau Niwclear Fesul Gwladwriaeth
Rwsia – 13,000
Unol Daleithiau America – 9,400
Gwledydd Prydain – 185
Ffrainc – 300
China – 240
India – tua 70
Pacistan – tua 80
Gogledd Corea – tua 5
Israel – tua 80 (heb ei gadarnhau)
