Bydd y Blaid Werdd yn gwahodd pleidleiswyr yng Nghymru i “droi’n wyrdd” heddiw (dydd Mercher, Mehefin 19), wrth lansio maniffesto sy’n cynnig “gweledigaeth ysbrydoledig a blaengar ar gyfer Cymru sy’n ysu am newid”.
O dan gynlluniau gafodd eu cyhoeddi’r wythnos ddiwethaf i drethu pobol gyfoethog yn fwy llym, byddai’r maniffesto yn sicrhau bod o leiaf £3bn ychwanegol ar gael ar gyfer gwasanaethau cyhoeddus yng Nghymru, yn ôl y blaid.
Byddai’r arian sy’n cael ei godi a’r benthyca i fuddsoddi yn “trawsnewid” iechyd, tai a thrafnidiaeth yng Nghymru, tra’n creu swyddi diogel sy’n talu’n dda, medden nhw.
Beth mae Plaid Werdd Cymru yn ei addo?
Mae’r maniffesto yn ymrwymo i:
- flaenoriaethu gweithredu ar gyfer adferiad hinsawdd a bioamrywiaeth, creu swyddi gwyrdd newydd, a chefnogi pobol yn economaidd drwy’r newidiadau sydd eu hangen
- trawsnewidiad Economaidd Gwyrdd i greu miloedd o swyddi wrth symud i fod yn gymdeithas sero net
- gweithredu ar frys i lanhau ac adfywio ein hafonydd, moroedd a chefn gwlad
- cydnabod fod y celfyddydau a chwaraeon yn hanfodol i lesiant, gan gadw cyfleusterau chwaraeon, amgueddfeydd, theatrau, llyfrgelloedd ac orielau celf leol ar agor ac yn ffynnu
- gwneud y system nawdd cymdeithasol yn ddigonol, gyda chynnydd o £40 yr wythnos mewn Credyd Cynhwysol
- mynd i’r afael â thlodi plant, dileu’r cap ar fudd-daliadau dau blentyn, a darparu prydau ysgol maethlon am ddim i bob plentyn gan gynnwys yn ystod gwyliau’r ysgol.
- diogelu ac adfer y Gwasanaeth Iechyd Gwladol a Gofal Cenedlaethol
- adeiladu o leiaf 12,000 o gartrefi newydd bob blwyddyn, gydag o leiaf 7,000 ohonyn nhw’n gartrefi cyngor a chymdeithasol
- cyflwyno rheolaethau rhent, rhoi terfyn ar droi allan heb fai, a sicrhau bod tai yn fforddiadwy i bawb
- cydweithio â ffermwyr ar system daliadau ar gyfer ffermio mwy cyfeillgar i natur, tra’n cynyddu cyfanswm y cyllid sydd ar gael ar gyfer cymorth
- cymunedau i elwa ar swyddi newydd, ond hefyd ar incwm lleol o ffynonellau ynni adnewyddadwy lleol. Gallai datganoli Ystâd y Goron sicrhau bod manteision ynni adnewyddadwy ar y môr o fudd i bobol Cymru
- cadoediad ar unwaith yn Gaza, cefnogaeth i gyflwyniad De Affrica i’r Llys Cyfiawnder Rhyngwladol, rhyddhau pob gwystlon, terfyn ar werthu arfau i Israel, a chydnabyddiaeth lawn i wladwriaeth Palesteina.
Trethu busnesau a’r cyfoethocaf
“Ni fydd geiriau cynnes yn achub ein Gwasanaeth Iechyd Gwladol,” meddai Anthony Slaughter, arweinydd y Blaid Werdd yng Nghymru.
“Mae Llafur yn camarwain y cyhoedd drwy honni y bydd eu cynlluniau yn gwneud gwahaniaeth.
“Byddai eu cynlluniau gwario truenus yn gyfystyr â thoriadau’n waeth na llymder o dan glymblaid y Torïaid a’r Democratiaid Rhyddfrydol.
“Os ydym am ddod â’n gwasanaethau cyhoeddus yn ôl o’r dibyn, mae angen buddsoddiad arnom.
“Ac ar ôl blynyddoedd o anghydraddoldeb cynyddol, mae’n rhaid i’r arian hwnnw ddod gan yr unigolion a’r cwmnïau cyfoethocaf.”
Bydd y blaid hefyd yn codi llais eto dros gynlluniau i ddatrys y system les.
“Bydd ein cynllun i godi Credyd Cynhwysol o £40 yr wythnos, a’r isafswm cyflog i £15 i bawb dros 16 oed yn brwydro yn erbyn y lefelau gwarthus o dlodi plant sydd gennym yng Nghymru,” meddai Anthony Slaughter wedyn.
“Bydd y Trawsnewidiad Economaidd Gwyrdd yn darparu rhaglen ôl-osod ddigynsail ar gyfer cartrefi i’w gwneud yn gynhesach ac yn rhatach i’w rhedeg.”
