Mae penodiad Craig Bellamy fel rheolwr newydd tîm pêl-droed Cymru yn “gychwyn taith allai fod yn daith go gyffrous,” yn ôl y sylwebydd pêl-droed a’r barnwr Nic Parry.
Daeth y cyhoeddiad gan y Gymdeithas Bêl Droed bore ma’ (Dydd Mawrth, 9 Gorffennaf), mai Craig Bellamy fydd yn olynu Rob Page, gafodd ei ddiswyddo fis diwethaf yn dilyn cyfres o ganlyniadau siomedig.
Er mai dyma’r tro cyntaf i Craig Bellamy gael ei benodi’n rheolwr, nid yw’r cyhoeddiad yn un syfrdanol am ei fod eisoes wedi ceisio am y rôl yn 2017 wedi ymadawiad Chris Coleman ac wedi bod mewn trafodaethau gyda’r Gymdeithas Bêl Droed yr wythnos ddiwethaf.
“Personoliaeth ddeublyg”
Wrth siarad â golwg360, dywed Nic Parry fod y cyhoeddiad yn “gychwyn taith allai fod yn daith go gyffrous, yn o heriol a gallai fynd un ffordd neu’r llall yn bennaf oherwydd cymeriad y dyn [Chris Bellamy].”
Does dim amheuaeth nad yw cymeriad Chris Bellamy yn un “diddorol”, meddai.
“Mae ganddo ddwy sialens; un ydi ei gymeriad ei hun, oherwydd mae ganddo bersonoliaeth ddeublyg.
“Mae wedi cael ei helyntion yn y gorffennol ac wedi ffraeo gydag enwau mawr y gêm bêl-droed ond, ar y llaw arall, mae blynyddoedd wedi pasio ac mae wedi dangos cymeriad personol cryf yn rhoi arian sylweddol i elusennau yn Affrica.”
“Mae’n rhaid gwneud yn siŵr ei fod yn rheoli’r ochr bositif honno a ddim yn disgyn i dywyllwch yr ochr mwy negyddol sydd wedi bod yno flynyddoedd nôl,” meddai Nic Parry.
Gellir dadlau mai’r sialens arall yw ei fod yn ymuno â’r swydd mewn cyfnod eithaf heriol i dîm pêl-droed Cymru.
“Mae’n ymuno mewn cyfnod pan mae pwll o chwaraewyr wirioneddol ddawnus Cymru yn llai na mae wedi bod ers amser maith.
“Wedyn mae’r her yna yn ei wynebu o hefyd,” meddai.
Edrych y tu hwnt i Gymru
Teimla Nic Parry nad oedd hi’n angenrheidiol i Gymro ymgymryd â’r swydd.
Roedd y Gymdeithas Bêl Droed wedi ystyried ffigurau y tu hwnt i Gymru ar gyfer y rôl, fel mae gwledydd eraill yn gwneud.
Roedd yna drafodaethau gyda chyn-seren Arsenal, Thierry Henry, rheolwr Georgia, Willy Sagnol, a rheolwr Oxford United, Des Buckingham.
“Does dim rheswm na ddylai Cymru fod mor eangfrydig â’r gwledydd hynny,” meddai Nic Parry.
Beth am Osian Roberts?
Roedd y Gymdeithas Bêl Droed hefyd wedi dangos diddordeb yn y Cymro Osian Roberts a oedd wedi bod yn fantais fawr i Chris Coleman yn ystod ymgyrch yr Ewros 2016.
Roedd cryn drafodaethau ar lawr gwlad yn y dyddiau cynnar o gydweithio posibl rhwng Osian Roberts a Craig Bellamy.
Meddai Nic Parry mai ei ddyhead oedd gweld “Osian Roberts yn rheolwr gyda Craig Bellamy a’u bod yn cydweithio gyda’i gilydd.
“Dyna wnes i ddarogan o’r cychwyn cyntaf.”
Ond cyhoeddodd Osian Roberts gychwyn y mis nad oedd am gael ei ystyried ar gyfer y rôl oherwydd ei ymrwymiadau â chlwb Como yn Yr Eidal wedi iddo eu harwain o Serie B i Serie A y tymor diwethaf.
“Mi fuasai Craig Bellamy wedi gallu elwa o gael rhywun o’r profiad yna a’r llonyddwch i fod yn bartner iddo.
“Yn y cyfamser, dw i’n meddwl y bydd yn cael llawer iawn o help gan y capten Ben Davies yn arbennig,” meddai Nic Parry.
Angerdd
Mae ymateb y cefnogwyr yn gyffredinol wedi bod yn hynod bositif ac mae’r Wal Goch yn amlwg yn ysu am yr angerdd.
“Mae angerdd yn cyfri i’r Wal Goch a chewch chi ddim chwaraewr, rheolwr na phersonoliaeth fwy angerddol na Craig Bellamy.”
