Llysgennad Gogledd Corea “yn cuddio” yn ôl ysbïwyr De Corea

Mae llysgennad dros dro Gogledd Corea i’r Eidal, Jo Song Gil, ynghyd a’i wraig, wedi bod yn cuddio ers mis Tachwedd, meddai asiantaeth ysbïo De Corea.

Dywedodd Aelod o Senedd De Corea, Kim Min-Ki, bod swyddog o Wasanaeth Gwybodaeth Genedlaethol Seoul (NIS) wedi rhannu’r wybodaeth mewn briff preifat i wleidyddion, gan honni nad yw’r gwasanaeth wedi clywed gan Jo Song Gil ers amser.

Dywed y gwasanaeth hefyd bod adroddiadau gan gyfryngau De Corea – sydd ddim yn bosib eu cadarnhau ar hyn bryd – ond sy’n honni bod Jo Song Gil o dan warchodaeth llywodraeth Yr Eidal wrth geisio cael lloches yn y Gorllewin a gadael Gogledd Corea.

Mae Gogledd Corea yn hanesyddol yn hynod o sensitif ynglyn â phobol sy’n troi côt, yn enwedig ymhlith yr elit diplomyddol. Maen nhw’n aml yn mynnu mai cynllwynio gan Dde Corea neu’r Unol Daleithiau sydd y tu ôl i achosion felly.

Nid yw Gogledd Corea wedi gwneud unrhyw sylwa am Jo Song Gil eto.