Osborne - chwech wythnos
Chwech wythnos sydd gan ardal yr Ewro i roi ei thŷ mewn trefn, yn ôl y Canghellor, George Osborne.
Ac mae yna arwyddion bod cyfarfodydd o’r 20 gwlad gyfoethoca’ a Chronfa Ariannol y Byd – yr IMF – wedi dod i gytundeb ynglŷn â dyfodol Gwlad Groeg.
Y disgwyl yw y bydd y wlad yn cael caniatâd i ddileu tua hanner ei dyledion ac y bydd cronfa ganolog i helpu gwledydd bregus yn cael ei chryfhau.
Yn ôl un adroddiad, fe allai gwerth y pecyn cyfan fod cymaint â £2.6 triliwn, ac fe fydd rhai banciau hefyd yn cael chwistrelliad o arian i’w helpu i wynebu dyledion.
‘Argyfwng yn waeth’ meddai Darling
Yn ôl George Osborne, roedd gwledydd ardal yr Ewro wedi deall eu bod nhw yng nghanol argyfwng economaidd y byd.
“R’yn ni wedi eu gweld nhw’n cydnabod bod yr argyfwng wedi mynd i gyfnod newydd peryglus a gorau po gynta’ i economi’r byd y gallwn ni ei ddatrys er gwell,” meddai.
Fe ddywedodd y byddai’n rhaid cael ateb terfynol erbyn cyfarfod o wledydd cyfoethog y G20 yn Ffrainc ym mis Tachwedd.
Ac mae ei ragflaenydd, Alistair Darling, wedi rhybuddio bod yr argyfwng hyd yn oed yn waeth na’r trafferthion dair blynedd yn ôl.