Mae adeiladwr wedi ei ganfod yn euog o ddynladdiad, ar ôl i wal frics gwympo ar ben merch tair oed.
Roedd Meg Burgess ar ei ffordd adref pan ddaeth y wal i lawr am ei phen ym mis Gorffennaf 2008.
Yn Llys y Goron Yr Wyddgrug, dywedodd y barnwr Merfyn Hughes wrth George Collier, sy’n 49 oed ac yn dod o Fae Cinmel, y bydd yn wynebu cyfnod yn y carchar.
Bydd George Collier yn cael ei ddedfrydu yn ddiweddarach, ac fe gafodd ei ryddhau ar fechnïaeth.
Mae cwmni George Collier, Parcol, wedi ei gyhuddo o droseddau iechyd a diogelwch.
Clywodd y llys gan yr erlynydd fod esgeulustod George Collier wedi arwain at farwolaeth y ferch.
Dywedodd George Collier mai wal mewn gardd oedd hi.
Ychwanegodd yr erlynydd y dylai Collier fod wedi sylweddoli’r perygl y gallai’r wal ei achosi.
