Pylu mae’r gobeithion o ddod o hyd i bump o forwyr o Rwsia sydd ar goll ar ôl i long nwyddau fynd i drafferthion oddi ar arfordir Pen Llŷn fore dydd Sul.
Fe fydd gwylwyr y glannau yn parhau i chwilio am griw’r MV Swanland nes iddi nosi heno ond mae ail ddiwrnod o chwilio am y pum dyn wedi bod yn aflwyddiannus, meddai’r Asiantaeth Forwrol A Gwylwyr Y Glannau.
Fe suddodd y llong yn y Môr Iwerydd ar ôl cael ei daro gan “don enfawr” yn ystod oriau mân bore Sul.
Y pump sy’n dal ar goll yw’r Capten Yury Shmelev, 44, y prif beiriannydd Gennadiy Meshkov, 52, yr ail beiriannydd Mikhail Starchevoy, 60, y llongwr Sergey Kharchenko, 51, a’r cogydd Oleg Andriets, 49.
Cafodd y swyddog Roman Savin, 26, a’r llongwr Vitaly Karpenko, 48 eu hachub gan hofrennydd y llu awyr.
Cafwyd hyd i gorff y prif swyddog Leonid Safonov, 50, yn fuan wedyn.
Dywedodd rheolwr gwylwyr y glannau yng Nghaergybi Ray Carson: “Yn anffodus rydan ni wedi methu dod o hyd i’r morwyr sydd ar goll.
“Fe fyddwn ni yn chwilio am y tro olaf heddiw.”
Roedd y Tywysog William yn gyd-beilot ar yr hofrennydd oedd wedi achub y ddau longwr. Heddiw, roedd llysgennad Rwsia wedi anfon llythyr at y tywysog yn diolch i’r timau chwilio ac achub am eu ymdrechion.
Fe aeth y Swanland i drafferthion tua 2am fore Sul rhyw 10 milltir oddiar arfordir Pen Llŷn. Mae gwylwyr y glannau yn credu y gallai’r gwyntoedd cryfion yn y Môr Iwerydd fod wedi achosi’r ddamwain.
Roedd y llong, sy’n cael ei reoli gan gwmni Torbulk Cyf yn Grimsby, yn cludo cerrig calch o Landdulas, ger Abergele i Cowes ar Ynys Wyth.
Dywedodd Andy Williamson, rheolwr gyfarwyddwr Torbulk heddiw eu bod nhw wedi cysylltu â theuluoedd y morwyr a’u bod yn parhau i gadw mewn cysylltiad gyda nhw ynglŷn â unrhyw ddatblygiadau.
Dywedodd bod y cwmni yn adnabod y criw yn dda a’u bod wedi cyflawni sawl cytundeb iddyn nhw.
“Rydyn ni yn meddwl am y teuluoedd yn ystod y cyfnod anodd hwn,” meddai.
Dywedodd y cwmni bod y ddau longwr arall yn cael gofal mewn gwesty a’u bod wedi siarad gyda’u teuluoedd.
Mae ymchwiliad eisoes ar y gweill i ddarganfod pam fod y llong wedi suddo.