Mae S4C wedi dod i gytundeb â Sky Sports i ddarlledu pob un o gemau pêl-droed dynion Cymru yn fyw yn ystod y ddau dymor nesa’.
Mae’r cytundeb ar gyfer 16 gêm yn cynnwys dangos pob un o gemau Cymru yn Nhwrnamaint Cynghrair y Cenhedloedd UEFA a gemau rhagbrofol Pencampwriaeth UEFA Euro 2020.
Bydd y ddwy gêm gyfeillgar yn erbyn Sbaen ar Hydref 11 ac Albania ar Dachwedd 20 hefyd yn cael eu dangos.
“Newyddion ardderchog”
“Mae hyn yn newyddion ardderchog i wylwyr S4C ac i gefnogwyr pêl-droed Cymru,” meddai Amanda Rees, Cyfarwyddwr Cynnwys S4C.
“Yr ydym i gyd yn cofio’r gystadleuaeth Ewro ddiwethaf yn 2016 a’r llawenydd a’r pleser a ddaeth hynny i bawb yng Nghymru.
“Roedd yn fraint i allu dod â’r profiadau hynny i’n gwylwyr.
“Gobeithio y bydd y ffordd i 2020 yr un mor gyffrous a llwyddiannus ar y maes ac ar y sgrin.”
Bydd yr arlwy yn dechrau’r wythnos hon gyda gemau cynta’ Cynghrair y Cenhedloedd, wrth i Gymru herio Gweriniaeth Iwerddon nos Iau (Medi 6), ac yna Denmarc yn Arhus ddydd Sul (Medi 9).
