Llun sy'n mynd gyda deiseb yn erbyn y llosgydd (www,change,org)
Mae disgwyl tyrfa fawr yng nghanol y Barri fory i brotestio yn erbyn cynllun i godi llosgydd gwastraff coed yn nociau’r dre’.
Mae’n benllanw i flynyddoedd o ymgyrchu yn erbyn y bwriad, gydag ymgynghoriad ar y cynllun yn dod i ben ddiwedd Awst
Mae’r gwrthwynebwyr wedi trefnu diwrnod o weithgareddau yn Sgwâr y Brenin yn y Barri – dyma’r cyfle ola’, medden nhw, i brotestio yn erbyn y datblygiad.
Y cefndir
Mae’r dadlau tros y llosgydd wedi para o leia’ saith mlynedd, gyda chwmni Biomass UK No 2 yn cael caniatâd terfynol y llynedd gan Gyngor Bro Morgannwg.
YN awr mae’r corff amgylcheddol, Cyfoeth Naturiol Cymru’n cynnal ymgynghoriad wrth ystyried rhoi trwydded i’r llosgydd ai peidio.
Fe fydd yr ymgynghoriad hwnnw’n dod i ben ar 28 Awst eleni.
Dadleuon y gwrthwynebwyr
Yn ôl y gwrthwynebwyr, fe fyddai mwg o’r llosgydd yn effeithio ar filoedd o gartrefi, wrth gael ei chwythu o’r dociau ar draws tre’r Barri.
Maen nhw hefyd yn dadlau bod modd ailgylchu’r gwastraff pren, yn hytrach na’i losgi, ac na fydd y llosgydd yn creu fawr ddim swyddi newydd.
Fe fyddai’r gwastraff yn cael eu gludo i mewn o’r tu allan, medden nhw.
Mae’r datblygwyr, ar y llaw arall, wedi dadlau’n gry’ na fydd y llosgydd yn fygythiad i iechyd pobol.
