Sêr roc yn helpu ffoaduriaid

Y Manics
Mae casgliad newydd o ganeuon gan artistiaid o Gymru wedi cael ei gyhoeddi heddiw er mwyn codi arian i’r ffoaduriaid sydd wedi ffoi o Syria

Rhoddodd artistiaid fel y Super Furry Animals a’r Manic Street Preachers eu traciau i’r achos am ddim.

Mae caneuon Cymraeg hefyd yn cael eu cynnwys yn y casgliad gan gynnwys rhai gan Gwenno Saunders, Kizzy Crawford ac Aled ac Iwan Rheon.

“Roedd yn anrhydedd cael fy ngwahodd i gymryd rhan,” meddai Aled Rheon.

“Mae’n hynod o bwysig ac roeddwn yn falch cael helpu’r achos da.”

Lluniau torcalonnus yn ysgogi’r cwbl

“Gwelais luniau o Alan Kurdi bach ar y traeth ac o blant bach eraill ar ffo ac roedd hynny’n torri fy nghalon,” meddai David Owens, newyddiadurwr sy’n gyfrifol am y cynllun.

“Roeddwn i eisiau gwneud rhywbeth i helpu.”

Ac yn ôl ef roedd hi’n hawdd iawn i gael y casgliad at ei gilydd mewn cyfnod byr,

“Roedd pawb wedi cytuno, ac mae’n wych gweld pobl yn dod at ei gilydd. Diolch yn fawr iawn i’r holl artistiaid, y rheolwyr recordiau a phawb arall bu’n helpu gyda’r cynllun.”

Mae’r casgliad ar gael o http://welshrockforrefugees.bandcamp.com/ ac mae ei holl elw yn mynd at yr elusen, Refugee Action.

“Mae’r ymateb wedi bod yn wych ers i ni gyhoeddi’r casgliad bore ‘ma, rydym ni wedi codi miloedd yn barod i’r elusen,” meddai David Owens.

Yr artistiaid i gyd:

Super Furry Animals

60ft Dolls

Houdini Dax

The Joy Formidable

Amy Wadge

Cian Ciaran

Climbing Trees

Pale Blue Dots

Euros Childs