Mae’r Democratiaid Rhyddfrydol Cymreig wedi beirniadu Llywodraeth Prydain am fod yn “gul eu meddwl” wedi iddyn nhw wrthod pum cais cynllunio i godi ffermydd gwynt yng Nghanolbarth Cymru.
Daeth cyhoeddiad y Gweinidog Ynni, Andrea Leadsom, brynhawn ddoe gan ddweud y byddai 5 cais allan o 6 yn cael eu gwrthod ym Mhowys.
Daw’r penderfyniad hwn er gwaethaf argymhellion cadarnhaol yr Arolygydd Cynllunio Annibynnol a oedd o blaid tair ohonyn nhw.
“Gwrthod mentrau gwyrdd”
Fe wnaeth ymgeisydd cynlluniad y Democratiaid Rhyddfrydol yn sir Drefaldwyn, Jane Dodds, feirniadu’r penderfyniad gan ddweud ei bod hi wedi’i synnu gan Lywodraeth Prydain.
“Mae galw cynyddol ar y DU i fuddsoddi mewn ynni adnewyddadwy er mwyn mynd i’r afael â’r bygythiadau i newid hinsawdd”, meddai.
“Ond eto, mae’r Llywodraeth Geidwadol fel petaen nhw’n benderfynol o wrthod mentrau gwyrdd bob cyfle gânt”.
Esboniodd hefyd am y potensial oedd gan y cynlluniau hyn i gymunedau gwledig yr ardal, drwy gynnig swyddi, datblygiadau economaidd a buddsoddiad i’r ardal.
“Dw i’n siomedig i weld y cyfleoedd hyn yn cael eu gwastraffu”, meddai.
“Cul eu meddwl”
Fe gyhuddodd William Powell, Llefarydd yr Amgylchedd a Materion Gwledig y Democratiaid Rhyddfrydol Cymreig Llywodraeth Geidwadol y DU o “fod yn gul eu meddwl pan ddaw’n fater o ynni adnewyddadwy”.
Nid oedd chwaith yn deall pam fod yr Ysgrifennydd Gwladol wedi gwyro oddi wrth argymhellion yr Arolygydd annibynnol.
“Mae hyn yn codi’r cwestiwn ynghylch sut ydyn ni’n mynd i ddiogelu’r ynni fydd ei angen ar deuluoedd a busnesau yn y dyfodol?
“Byddai rhuthro at gynlluniau ffracio neu niwclear yn frawychus iawn – i’n cenhedlaeth ni a’r nesaf”, ychwanegodd William Powell.
Y ffermydd gwynt
Y pum cynllun a wrthodwyd oedd ffermydd gwynt Llanbadarn Fynydd, Llaithddu, Llanbrynmair, Carnedd Wen, ynghyd â chyswllt trydan uwchben y ddaear rhwng Llandinam i is-orsaf drydan Y Trallwng.
Ond mae cynllun i ail-bweru fferm wynt Llandinam wedi’i gymeradwyo.