Dyma hi o’r diwedd – wythnos yr etholiad!
Wrth i’r mag fynd i’r Wasg roedd sawl diwrnod i fynd tan y diwrnod mawr, ac roedd yna lawer o ansicrwydd o hyd.
Felly, yn hytrach na malu awyr am yr hyn na wyddom, beth am i Fwrlwm ganolbwyntio ar rywbeth sy’n bownd o oroesi’r bleidlais fawr?
Waeth beth fydd yn digwydd ddydd Iau, mae yna un sicrwydd digon diddorol – heb os mi fydd y drafodaeth am annibyniaeth yn dal i dyfu oddi fewn i’r Blaid Lafur.
Lansiwyd ‘Llafur tros Gymru Annibynnol’ rai blynyddoedd yn ôl, ac wythnos ddiwetha’ wnaeth Llywydd y grŵp, Bob Lloyd, rannu ei farn am faniffesto Llafur ar bodlediad Hiraeth.
Mae’r ddogfen yn pwysleisio bod Llafur Cymru yn deisyfu trefn ffederal i’r Deyrnas Unedig… a dyw hynny ddim wedi plesio Mr Lloyd.
“Roedd hynny’n syndod i ni,” meddai ar y podlediad. “Bod [y maniffesto] mor amlwg o blaid ffederaliaeth. A hynny pan dyw’r drafodaeth braidd wedi cychwyn oddi fewn i’r blaid.”
Wnaeth e’ hefyd rannu ei rwystredigaeth ynghylch cynllun y blaid i sefydlu comisiwn annibynnol i ystyried dyfodol cyfansoddiadol Cymru.
“Cyn i’r comisiwn ddechrau ar y gwaith, mae Llafur Cymru wedi datgan eu bod yn gobeithio mai ffederaliaeth fydd y casgliad,” meddai yn anniddig.
Er gwaetha’ ei rwystredigaeth, roedd ganddo ambell sylw cynhesach.
Roedd yn canmol tôn y maniffesto mewn rhai mannau, yn enwedig y brawddegau sy’n lladd ar Lywodraeth San Steffan – “bangin’ lines” yn ôl Bob.
“Mae arolygon barn y blynyddoedd diwethaf wedi dangos bod mwyafrif o gefnogwyr Llafur Cymru yn cefnogi annibyniaeth,” meddai.
“Ac mae rhethreg y maniffesto yn awgrymu bod y blaid yn deall hynny. Mae’n ddigon da am y tro!”
Troeon trwstan Nathan Gill
![](https://golwg.360.cymru/ased/sites/2/2021/05/Nathan-Gill-mawr-308x308.jpg)
Bydd y dadleuon teledu yn hen hanes erbyn i chi weld y Bwrlwm hwn, ond alla’ i ddim eich hamddifadu o’r stori hon…
Cafodd BBC Wales Leaders’ Debate ei chynnal ddiwedd fis Ebrill, ac yn wahanol i ddadl deledu ITV, mi rannwyd y rhaglen hon yn ddwy.
Yn ystod yr awr gyntaf mi aeth arweinwyr Cymreig Llafur, y Ceidwadwyr, Plaid Cymru, y Democratiaid Rhyddfrydol a Phlaid Diddymu’r Cynulliad benben â’i gilydd.
Ac yn dilyn hynny mi gynhaliwyd dadl rhwng ffigyrau o UKIP, y Blaid Werdd a Reform UK.
Bydd gwylwyr craff wedi sylweddoli mai Nathan Gill, arweinydd Reform UK yng Nghymru a chyn-Aelod UKIP o’r Senedd, oedd i fod i gynrychioli ei blaid yntau.
Ond ar y noson cafodd y blaid ei chynrychioli gan Jamie Jenkins – ymgeisydd Reform UK a gŵr sydd yn adnabyddus yn bennaf am rannu ystadegau covid ar Twitter.
![](https://golwg.360.cymru/ased/sites/2/2021/05/Jamie-Jenkins-mawr-308x308.jpg)
Ar bennod ddiweddaraf Walescast, podlediad BBC am wleidyddiaeth Cymru, wnaeth Nick Servini, cyflwynydd yr ail ddadl, esbonio beth aeth o’i le.
“Chware teg i Jamie Jenkins,” meddai. “Roedd hi’n dri o’r gloch y prynhawn, neu’n bedwar y prynhawn, ar y boi’n cael gwybod bod e’n dod ar y sioe!
“Wnaeth car Nathan Gill dorri lawr. Ac yn y pendraw bu’n rhaid i ni ffonio Jamie Jenkins a gofyn iddo fe wneud y sioe.
“Roedd e’ i fod i gymryd rhan mewn hystings rhithiol gyda phobol Pontypridd. Ond bu’n rhaid iddo gefnu ar hynny, gwisgo’i siwt, a chymryd rhan yn fyw ar BBC One Wales.”
Dechreuodd y rhaglen am hanner awr wedi wyth y nos. Dyn a ŵyr pryd wnaeth Nathan Gill adael yr A55!