Gweilch 44–10 Caeredin
Cafodd y dorf wledd yn Stadiwm Liberty nos Sadwrn wrth i’r Gweilch roi cweir i Gaeredin yn y RaboDirect Pro12.
Sgoriodd y tîm cartref chwe chais mewn buddugoliaeth gyfforddus, dau yr un i Richard Hibbard ac Eli Walker, un i Jeff Hassler ac un gwych i Matthew Morgan.
Hanner Cyntaf
Dechreuodd y Gweilch yn dda gyda chais i’r asgellwr newydd o Ganada, Jeff Hassler, wedi dim ond tri munud. Ychwanegodd Dan Biggar y ddau bwynt cyn llwyddo gyda dwy gic gosb i ymestyn y fantais i dri phwynt ar ddeg erbyn hanner ffordd trwy’r hanner.
Un gic gosb o droed Harry Leonard oedd unig ymateb Caeredin cyn i’r Gweilch orffen yr hanner yn gryf hefyd. Tiriodd Walker yn y gornel yn dilyn dadlwythiad da gan Richard Fussell yn y dacl. Methodd Biggar y trosiad y tro hwn ond roedd y Gweilch ar y blaen o 18-3 ar yr egwyl.
Ail Hanner
Dechreuodd yr ail hanner yn debyg i’r cyntaf – gyda chais cynnar i’r Gweilch. Hibbard oedd y sgoriwr y tro hwn, yn sgorio o’r lein gyda symudiad yn syth o’r cae ymarfer.
Rhoddodd asgellwr Caeredin, Tim Visser, lygedyn o obaith i’r ymwelwyr yn fuan wedyn wrth dorri trwy amddiffyn y Gweilch yn rhy rhwydd o lawer i sgorio cais a chau’r bwlch i 13 pwynt gyda throsiad Leonard.
Bu rhaid i’r Gweilch chwarae deg munud gyda phedwar dyn ar ddeg wedi hynny yn dilyn cerdyn melyn i Justin Tipuric am dacl beryglus.
Ond y Cymry a gafodd y gorau o’r cyfnod hwnnw gan ychwanegu dau gais arall. Croesodd Hibbard i ddechrau am ei ail ef a phedwerydd y tîm i sicrhau’r pwynt bonws. Yna tiriodd Walker am yr eildro hefyd yn dilyn cic dda Fussell.
Roedd y fuddugoliaeth yn gwbl ddiogel felly cyn i’r gêm golli ei siâp yn y munudau olaf. Cafwyd un fflach arall cyn y chwiban olaf serch hynny gyda chais unigol gwych yr eilydd faswr, Matthew Morgan. Rhedodd Morgan hyd y cae i gyd cyn llithro drosodd yn y gornel a throsi ei ymdrech ei hun, 44-10 y sgôr terfynol.
Mae’r canlyniad yn codi’r Gweilch i’r ail safle yn nhabl y Pro12 wedi dechrau di guro i’r tymor.
.
Gweilch
Ceisiau: Jeff Hassler 3’, Eli Walker 38’, 55’, Richard Hibbard 42’, 53’, Matthew Morgan 77’
Trosiadau: Dan Biggar 4’, 53’, 56’, Matthew Morgan 78’
Ciciau Cosb: Dan Biggar 16’, 19’
Cerdyn Melyn: Justin Tipuric 50’
.
Caeredin
Cais: Tim Visser 45’
Trosiad: Harry Leonard 46’
Cic Cosb: Harry Leonard 32’
.
Torf: 8,536
