Rhys Griffiths
Bydd yr ymosodwr Rhys Griffiths yn wynebu ei hen glwb yng ngêm fyw gynta’r tymor newydd, wrth i Lanelli deithio i Bort Talbot.
Cafodd rhaglen y tymor ei gyhoeddi heddiw gan Uwch Gynghrair Cymru.
Ers sefydlu’r ‘Deuddeg Disglair’, mae cynnydd o 26% wedi bod yng nghyfartaledd torfeydd y clybiau o’u cymharu â’r tymhorau blaenorol.
“Rwyf yn edrych ymlaen yn arw at y tymor a’r gêm gynta’n benodol,” meddai Rhys Griffiths ar wefan Uwch Gynghrair Cymru. “Bydd herio Llanelli yn ychwanegu dipyn o awch i’r achlysur.
“Fe gefais amser gwych yn Llanelli ac rwy’n dymuno’r gorau iddyn nhw yn Ewro, ond rwy’n ysu i ddechrau’r tymor newydd gyda Phort Talbot,” ychwanegodd yr ymosodwr.
“Bydd safon y gynghrair yn gwella eto’r tymor yma gan fod cymaint o chwaraewyr o safon wedi eu gwasgaru ar hyd a lled y deuddeg clwb.”
Mae GAP Cei Conna yn wynebu her ar eu hymweliad cyntaf i’r Uwch Gynghrair ers dwy flynedd wrth iddyn nhw deithio i Fangor.
Bydd Y Seintiau Newydd yn cychwyn eu hymgais i amddiffyn eu coron trwy groesawu Airbus i Groesoswallt.
Dyma’r rhestr lawn o gemau agoriadol yr Uwch Gynghrair ar gyfer y tymor i ddod.
17/08/2012
Bala v Y Drenewydd
Bangor v Gap Cei Conna
Y Seintiau Newydd v Airbus
18/08/2012
Caerfyrddin v Aberystwyth
Port Talbot v Llanelli
Prestatyn v Lido Afan
