Bu’r blynyddoedd diwethaf yn gyfnod llwm i glwb pêl-droed Wrecsam wrth iddyn nhw orfod gwneud heb bêl-droed ym mhrif gynghreiriau Lloegr ers 2008… bron i ddegawd erbyn hyn.
Ar gyfer y tymor i ddod mae’r rheolwr Dean Keates wedi newid y garfan gan ychwanegu 13 chwaraewr.
Y disgwyl yw y bydd torf o ddua 6,000 am y gêm agoriadol yn erbyn Macclesfield ar y Cae Ras yfory, gyda’r cefnogwyr yn obeithiol o ddyrchafiad y tymor hwn.
Ond yn ôl un o gyn-chwaraewr y clwb, mae angen pwyll.
“Mae’r cefnogwyr yn haeddu gwell,” meddai Waynne Phillips, “dw i’n gefnogwr a gobeithio mai tymor hon yw’r un lle mae Wrecsam yn cael dyrchafiad. Mae’r gemau dechrau tymor wedi bod yn iawn – ond mae’n rhaid cofio rydan heb di chwarae neb o ru’n safon. Y gêm agoriadol bydd y pren mesur a bydd Macclesfield yn wrthwynebwyr anodd. Ar ôl deg gêm cawn wybod mwy – sut bydd y chwaraewyr newydd wedi setlo a phwy fydd yn brwydro am y safleoedd uchel.”
Mae Waynne Phillips yn gobeithio bydd y chwaraewyr ifanc Leo Smith a Olly Marx yn cael eu cyfle yn y tîm gyntaf. “Maen nhw wedi bod yn wych yn gemau cyfeillgar, a dio’m ots faint di oedran nhw, pe bai bod nhw digon da mae angen iddyn nhw chwarae. Roeddwn i’n ffodus bod fy rheolwr Brian Flynn a ffydd ynau, os ti digon da ti dechrau.”
600 ym Mhortiwgal
“Mae’r chwaraewr newydd yn gorfod deall y clwb,” meddai Waynne Phillips. “Roedd 600 wedi mynd drosodd i Bortiwgal am gêm gyfeillgar – anhygoel. Ac mae sôn am tua 6,000 dydd Sadwrn, meddyliwch fod ni’n cael dechrau da, bydd posib 8,000 yn dod trwy’r gatiau.
“O ran chwaraewyr newydd mae Manny Smith yn nabod y clwb ac wedi chwarae llawer o gemau i Gateshead tymor diwethaf – dwi’n hapus á fo, ac mae James Jennings yn chwaraewr da – ond dwi heb weld llawer o’r chwaraewyr eraill i roi fy marn.”
Mae’r clwb yn ymdrechu i ddenu cefnogwyr newydd i’r Cae Ras gyda thocyn i blentyn ond yn £1 a bws o Bwllheli am y gêm agoriadol yn stopio ym Mhorthmadog, y Bala a Chorwen.
