Emlyn Lewis, Met Caerdydd (Llun: Graham Haines)
Fe fydd timau pêl-droed Met Caerdydd a Bangor yn herio’i gilydd y prynhawn yma am le yn Ewrop y tymor nesaf.
Mae bonws ariannol o €215,000 i’r enillwyr yn ogystal.
Hanes
Met Caerdydd fyddai’r tîm cyntaf erioed o fyfyrwyr i gyrraedd cystadleuaeth Ewropeaidd.
Bydden nhw’n sicrhau eu lle yn rownd gyntaf ragbrofol Cynghrair Ewropa.
Gorffennodd y tîm yn y chweched safle yn yr Uwch Gynghrair eleni, ac mae cyn-amddiffynnwr Abertawe a Chymru’n Gyfarwyddwr Pêl-droed y clwb.
Llwyddodd Bangor i gyrraedd rownd derfynol gemau ail-gyfle Uwch Gynghrair Cymru drwy guro’r Drenewydd o 3-2, a’r myfyrwyr wedi curo Caerfyrddin o 2-1.
Dydy Bangor ddim wedi cystadlu yn Ewrop ers tair blynedd pan gollon nhw o 8-0 yn erbyn Stjarnan o Wlad yr Iâ.
Pe bai’r myfyrwyr yn fuddugol, fe fyddan nhw’n cyrraedd Ewrop ar ddiwedd eu tymor cyntaf yn yr Uwch Gynghrair.
Pwy fydd yn cynrychioli’r Uwch Gynghrair yn Ewrop?
Bangor v Met Caerdydd yn rownd derfynol y gemau ail gyfle yn fyw dydd Sadwrn am 5, @S4C. pic.twitter.com/XZ8GnhAaqh
— sgorio (@sgorio) May 11, 2017
Bangor v Met Caerdydd – gemau’r gorffennol
Mae’r ddau dîm eisoes wedi herio’i gilydd bum gwaith y tymor hwn, gyda thair buddugoliaeth i Fangor a dwy i’r myfyrwyr.
Byddai buddugoliaeth i Fangor yn gam tuag at ail-greu rhai o ddyddiau euraid y gorffennol, pan herion nhw Napoli ac Atletico Madrid yn y 1960au a’r 1980au.
Cyrhaeddon nhw drydedd rownd ragbrofol Cynghrair Ewropa yn 2010-11 drwy guro FC Honka o’r Ffindir.
Maen nhw wedi cyrraedd cystadlaethau Ewrop 15 o weithiau, gan chwarae mewn 35 o gemau i gyd.
Canlyniadau’r gemau blaenorol
Met Caerdydd 2-3 Bangor (09/04/17)
Bangor 3-2 Met Caerdydd (18/02/17)
Met Caerdydd 4-0 Bangor (19/11/16)
Bangor 2-1 Met Caerdydd (02/10/16)
Bydd y gêm yn fyw ar S4c am 5 o’r gloch heno, gyda rhaglen Sgorio yn dechrau am 4.30pm.
Bydd yr holl drafod i’w weld ar Facebook Live Sgorio a gwefan s4c.cymru