Ben Davies
Mae disgwyl i Ben Davies a Michel Vorm adael Abertawe ac arwyddo i Tottenham Hotspur wrth i ragor o sêr adael Stadiwm Liberty.
Mae Davies eisoes wedi hedfan yn ôl o daith haf yr Elyrch yn yr UDA er mwyn cael prawf meddygol yn Spurs, gydag adroddiadau’n awgrymu y bydd Abertawe’n cyfnewid y cefnwr am y chwaraewr canol cae Gylfi Sigurdsson.
Doedd Abertawe ddim yn awyddus i werthu Davies am lai na £10m, tua’r un gwerth ag y mae Tottenham wedi’i roi ar Sigurdsson a dreuliodd gyfnod ar fenthyg gyda’r Elyrch yn 2012.
Yn ogystal â hynny, mae adroddiadau yn honni fod Spurs wedi cytuno ar ffi am y golwr Michel Vorm gydag Abertawe, gyda’r swm yn amrywio o rhwng £2.5m i £5m.
Mae’n ymddangos fod y trafodaethau rhwng Spurs ac Abertawe am Davies, sydd wedi bod yn mynd ymlaen ers wythnosau, yn tynnu at eu terfyn – ac fe allai’r Cymro arwyddo i’w glwb newydd mor fuan â heddiw.
Mae gan Abertawe eisoes Neil Taylor all gymryd lle Davies fel cefnwr chwith yn y tîm, ac maen nhw hefyd wedi paratoi am ymadawiad posib Michel Vorm wrth arwyddo’r golwr Lukas Fabianski o Arsenal.
Mae’r ymosodwr Michu eisoes wedi gadael Abertawe ar fenthyg i Napoli am dymor, gyda sïon yn parhau fod clybiau gan gynnwys Lerpwl ar ôl yr ymosodwr Wilfried Bony.
Yn ogystal â Fabianski, mae Abertawe hefyd wedi arwyddo’r ymosodwyr Bafetimbi Gomis a Marvin Emnes a’r amddiffynnwr Stephen Kingsley.
