Mae Graham Coughlan, rheolwr tîm pêl-droed Casnewydd, wedi gadael ei swydd.
Yn ôl yr Alltudion, daw ei ymadawiad yn dilyn trafodaethau.
Gorffennodd y tîm yn ddeunawfed yn yr Ail Adran y tymor diwethaf, ar ôl colli wyth gêm ola’r tymor.
Mewn datganiad, dywed y cadeirydd Huw Jenkins fod ganddo fe “barch llwyr” tuag at Graham Coughlan, a bod y penderfyniad yn un “arbennig o anodd o ystyried yr holl waith caled mae e wedi’i wneud i helpu i sefydlogi’r clwb dros y deunaw mis diwethaf”.
Dywed ei fod yn dymuno’r gorau iddo yn y dyfodol, ond fod rhaid “symud y clwb i gyfeiriad gwahanol” er mwyn sicrhau “llwyddiant parhaus”.
Ychwanega y bydd y clwb yn cyhoeddi rhagor o wybodaeth am sefyllfa’r rheolwr wrth iddyn nhw baratoi ar gyfer y tymor nesaf.
Cyfnod wrth y llyw
Cafodd Graham Coughlan ei benodi i’r swydd fis Hydref 2022, gan olynu James Rowberry.
Fe wnaethon nhw lwyddo i osgoi’r gwymp ar ddiwedd y tymor hwnnw, gan oresgyn pryderon ariannol hefyd.
Dechreuodd ymgyrch Coughlan yn gryf, wrth i Gasnewydd sicrhau gêm gwpan fawr yn erbyn Manchester United ym mhedwaredd rownd Cwpan FA Lloegr.
Ond roedd amheuon am ddyfodol y rheolwr ar ôl y rhediad gwael ar ddiwedd y tymor diwethaf.
