Angela Burns
Mae ystadegau newydd yn awgrymu bod pobol o Gymru yn llai bodlon gyda’u bywydau, yn ysu am bwrpas, yn llai hapus ac yn gofidio’n fwy na phobol gweddill Prydain.
Ac yn ôl y Torïaid mae’r ffigyrau’n dangos “bod Cymru yn cael ei heffeithio’n fwy gan broblemau iechyd meddwl na gweddill y Deyrnas Unedig”.
Yn ôl ystadegau’r Swyddfa Ystadegau, y Cymry sydd yn gofidio fwyaf o holl bobloedd Prydain – ac mae lefelau gorbryder yn cynyddu’n flynyddol.
Mewn pedwar maes gwahanol mae lefelau hapusrwydd awdurdodau Merthyr Tudful, Blaenau Gwent, Sir Gaerfyrddin, Abertawe, Caerdydd a Chaerffili yn is na’r cyfartaledd Prydeinig.
Marciau Hapusrwydd
- Boddhad â bywyd: Cymru 7.65 / Prydain 7.70
- Pwrpas mewn bywyd: Cymru 7.83 / Prydain 7.86
- Hapusrwydd: Cymru 7.48 / Prydain 7.51
- Gofid: Cymru 2.96 / Prydain 2.90
“Codi braw”
“Mae’r ffigyrau yma wir yn codi braw, ac yn awgrymu bod Cymru yn cael ei heffeithio’n fwy gan broblemau iechyd meddwl na gweddill y Deyrnas Unedig,” meddai’r Aelod Cynulliad Ceidwadol, Angela Burns.
“Byddaf yn ysgrifennu at Ysgrifennydd Iechyd y Cabinet am ei ymateb i’r ystadegau yma, gan ofyn sut mae Llywodraeth Cymru yn bwriadu mynd i’r afael â’r broblem yma.”
“Camarweiniol”
Dywedodd llefarydd ar ran Llywodraeth Cymru: “Mae gwella iechyd a lles pobl Cymru yn flaenoriaeth allweddol i ni. Yn ddiweddar cyhoeddwyd ein hamcanion llesiant sy’n cynnwys ffocws ar atal iechyd gwael a gwella cadernid emosiynol.
“Mae’r Swyddfa Ystadegau Gwladol eu hunain yn sôn taw’r gymhariaeth fwyaf priodol ydy cynnydd dros amser o fewn ardal a bod cymharu awdurdodau lleol yn ôl sgôr rhifol yn gamarweiniol.”