Huw Lewis
Mae Gweinidog Addysg Llywodraeth Cymru, Huw Lewis wedi dweud bod yna bosibilrwydd y gallai Cymru basio Lloegr o ran canlyniadau TGAU.
Fe gaiff wybod heddiw a yw ei broffwydoliaeth yn gywir y bydd Cymru’n cael mwy o ganlyniadau A*- C na Lloegr am y tro cynta’.
Ond mae disgwyl y bydd cynnydd bach yn y canlyniadau gorau yn Lloegr hefyd ac mae cymharu’r ddwy system yn mynd yn fwy a mwy anodd.
Y llynedd – ‘y gorau erioed’
Y llynedd, roedd y prif sylw i’r ffaith fod y bwlch wedi cau rhywfaint rhwng canlyniadau gorau Cymru a Lloegr – i 1.4% – a dywedodd Huw Lewis ar y pryd mai dyna oedd y canlyniadau gorau erioed gan honni eu bod yn “uchafbwynt hanesyddol”.
Fis diwetha’, honnodd y gallai Cymru fynd heibio i Loegr o ran canlyniadau TGAU eleni.
Cymhlethdod arall yw fod rhagor o bobol ifanc yng Nghymru bellach yn sefyll arholiadau yn gynt yn y flwyddyn.
Disgwyl cyflogau mawr
Heddiw hefyd mae arolwg newydd gan gwmni Santander yn honni bod person 16 oed ar gyfartaledd yn disgwyl ennill £89,000 y flwyddyn ar frig eu gyrfa – gyda bron i un o bob pump yn disgwyl ennill mwy na £100,000.
Mae hynny’n groes i’r sefyllfa ar hyn o bryd, gyda lefel cyfartalog cyflogau yn ddim ond £26,500.
Fe ddangosodd yr arolwg o ddisgwyliadau pobol ifanc 16 oed bod y rhan fwya’n ffafrio gyrfa ym maes meddygaeth a gofal iechyd, gyda chyfrifiadureg a thechnoleg gwybodaeth yn ail, o flaen cyfrifeg a bancio.
