Etholiad Cyffredinol 2024 – y canlyniadau

Mae ambell aelod arall o’r Cabinet wedi’u henwi.

Ysgrifennydd Gwaith a Phensiynau: Liz Kendall

Ysgrifennydd Trafnidiaeth: Louise Haigh

Ysgrifennydd Gwyddoniaeth, Arloesedd a Thechnoleg: Peter Kyle

Ysgrifennydd Busnes a Masnach: Jonathan Reynolds

Rydyn ni dal i aros am enwau Ysgrifennyddion Gwladol Cymru, yr Alban a Gogledd Iwerddon. Jo Stevens, Aelod Seneddol Dwyrain Caerdydd, oedd Ysgrifennydd Gwladol yr Wrthblaid cyn yr etholiad.

Ychydig mwy o’r Cabinet…

Gweinidog Addysg: Bridget Phillipson

Ysgrifennydd Iechyd: Wes Streeting

Ysgrifennydd Cyfiawnder: Shabana Mahmood

Ysgrifennydd Ynni: Edward Miliband

Mae Aled Thomas, fu’n sefyll dros y Blaid Geidwadol yng Ngheredigion Preseli, wedi dweud wrth golwg360 bod rhaid cael mwy o “hunaniaeth Gymreig” o fewn y blaid drwy gael arweinydd Ceidwadol yng Nghymru, fel sydd yn Yr Alban.

“Mae e’n glir ei bod hi wedi bod yn noson anodd i ni, yn enwedig yng Nghymru lle mae colli pob llais Ceidwadol yn San Steffan yn beth gwael,” meddai.

“Ond mae dal tîm cryf gennym ni yn y Senedd.

“Dw i yn credu bod angen i ni fel plaid wneud yr un math o beth a ddigwyddodd yn Yr Alban.

“Achos mae ganddyn nhw Arweinydd y Blaid Geidwadol i’r Alban, ac yn dechnegol does gennym ni ddim arweinydd yma yng Nghymru.

“Mae Andrew RT Davies yn arweinydd y blaid yn y Senedd wrth gwrs, ond oherwydd cyfansoddiad y blaid rydym yn dechnegol yn mynd efo Lloegr efo popeth.

“Ond mae rhaid i ni gael mwy o hunaniaeth Gymreig arno fe, ac wedyn mynd ymlaen at etholiad y Senedd yn 2026.”

Mae Keir Starmer wedi bod yn penodi’i Gabinet brynhawn heddiw, ac fel hyn mae pethau’n edrych hyd yn hyn.

Dirprwy Brif Weinidog – Angela Rayner

Canghellor y Trysorlys – Rachel Reeves (y fenyw gyntaf erioed i wneud y swydd)

Canghellor Dugiaeth Lancaster – Pat McFadden

Ysgrifennydd Tramor – David Lammy

Ysgrifennydd Cartref – Yvette Cooper

Ysgrifennydd Amddiffyn – John Healey

Mae golwg360 ar ddeall ei bod hi’n “debygol” mai’r ymgeisydd efo’r gyfran fwyaf o bleidleisiau yng Nghymru fydd yn arwain y blaid mewn i etholiad y Senedd yn 2026.

Gareth Beer, yr ymgeisydd yn Llanelli, gafodd y gyfran uchaf o bleidleisiau i’r blaid, gan orffen yn ail i Nia Griffith o tua 1,500 o bleidleisiau.

Cymru

Twf Reform: “Tebygol” mai Gareth Beer fydd yn arwain Reform yn etholiad Senedd 2026  

Rhys Owen

Mae golwg360 ar ddeall ei bod hi’n “debygol” mai’r ymgeisydd efo’r gyfran fwyaf o bleidleisiau fydd yn arwain y blaid mewn i etholiad Senedd 2026

Angela Rayner yw Dirprwy Brif Weinidog newydd y Deyrnas Unedig.

Yr Aelod Seneddol dros Ashton-under-Lyne ym Manceinion yw’r ysgrifennydd gwladol dros godi’r gwastad, tai a chymunedau hefyd.

Dydyn ni ddim yn disgwyl y canlyniad llawn heddiw, gan fod Inverness, Skye a West Ross-shire yn yr Alban yn mynd i ail-gyfrif fory (Gorffennaf 6). Mae un etholaeth arall yn ne-ddwyrain Lloegr, South Basildson a East Thurrock, yn cyfrif am y trydydd tro hefyd.

Ond oni bai am y ddwy sedd hynny, dyma’r canlyniadau fesul plaid: 

Llafur: 412 sedd

Y Ceidwadwyr: 121 sedd

Y Democratiaid Rhyddfrydol: 71 sedd

Yr SNP: 9 sedd

Sinn Fein: 7 sedd

Annibynnol: 6 sedd

DUP: 5 sedd

Plaid Cymru: 4 sedd

Reform: 4 sedd

Y Blaid Werdd: 4 sedd

Social Democratic & Labour Party: 2 sedd

Alliance Party: 1 sedd

Plaid Unoliaethol Ulster: 1 sedd

Traditional Unionist Voice: 1 sedd

Mae Aelodau Seneddol Llafur wrthi’n mynd mewn i Rif 10, a Keir Starmer wrthi’n penodi’i Gabinet, mae’n debyg.

Rachel Reeves, John Healey, Pat McFadden, David Lammy ac Angela Rayner yw rhai o’r enwau sydd wedi mynd mewn yn barod.

Mae Nigel Farage wedi bod yn cael ei heclo yn ystod cynhadledd Reform.

Fe wnaeth llond llaw o brotestwyr, tua chwech neu saith o bobol, dorri ar draws y gynhadledd, a chael eu hebrwng allan o’r digwyddiad yn Llundain.

Wrth iddo gael ei darfu, bu arweinydd Reform yn gweiddi “Boring! Boring!” ac ychwanegodd ei fod yn ei baratoi at San Steffan.

Dywed hefyd bod y pleidleisiau’n cael eu cyfrif am y trydydd tro yn South Basildon and East Thurrock, a bod yr ymgeisydd Reform yno ar y blaen o 120 pleidlais yn ystod y cyfrif cyntaf.

Mae Andrew RT Davies, Arweinydd y Ceidwadwyr Cymreig, wedi dymuno’r gorau i Rishi Sunak a Keir Starmer hefyd.

“Hoffwn ddymuno’r gorau un i Rishi Sunak a’i deulu wrth iddo adael Downing Street, a’r un fath i Keir Starmer with iddo gymryd drosodd fel ein Prif Weinidog,” meddai.

“Mae ein gwlad wych yn haeddu arweinyddiaeth effeithiol, a dw i’n dweud gyda’r diffuantrwydd pennaf fy mod i’n gobeithio y bydd yn llwyddo.

“Mae Prydain yn llwyddo os yw e’n llwyddo.”