Etholiad Cyffredinol 2024 – y pleidleisio

Cofiwch eich ID i gael lleisio barn

Am y tro cyntaf mewn etholiad cyffredinol, bydd angen i bleidleiswyr ddangos ID ffotograffig cyn cael eu papur pleidleisio. Bydd yr etholiad yn dilyn yr un drefn â’r etholiad Comisiynwyr yr Heddlu fis Mai.

Mae’r mathau o ID sy’n cael eu derbyn yn cynnwys:

– Pasbort

– Trwydded yrru

– Rhai cardiau teithio rhatach megis pas bws person hŷn

– Y Dystysgrif Awdurdod Pleidleisiwr.

Bydd pleidleiswyr yn gallu defnyddio ID sydd wedi dirwyn i ben os gellir eu hadnabod o’r ffotograff o hyd.

Fe fydd gorsafoedd pleidleisio yn agor am 7 bore fory, ac ar agor tan 10yh.

“Cyn i chi fynd i’r orsaf bleidleisio, gwnewch yn siŵr bod gennych yr ID sydd ei angen arnoch i bleidleisio. Bydd angen i chi ddangos y fersiwn wreiddiol, ni fydd copïau na lluniau yn cael eu derbyn,” meddai Rhydian Thomas, Pennaeth y Comisiwn Etholiadol, Cymru.

“Os na fyddwch yn cofio dod â’ch ID gyda chi i’r orsaf bleidleisio, gallwch ddychwelyd yn ddiweddarach yn y diwrnod gyda’ch ID.

“Bydd unrhyw un sy’n sefyll mewn ciw am 10pm yn gallu bwrw ei bleidlais.”

Waeth i ba blaid y byddan nhw’n perthyn, bydd gan Gymru lai o Aelodau Seneddol yn San Steffan ar ôl yr etholiad fory. 

Mae’r newid ffiniau yn golygu mai 32 o etholaethau fydd yng Nghymru, yn hytrach na 40. 

Oni bai am Ynys Môn, sydd gan statws arbennig gan ei bod hi’n ynys, mae newidiadau i ffiniau bob un o’r etholaethau eraill.

Cewch wybod mwy am sut mae pob un o’r etholau hynny wedi newid drwy fynd i’r rhestr ar waelod y dudalen Etholiad Cyffredinol 2024.

Wrth glicio ar y gwahanol seddi, gallwch weld rhestr o bob ymgeisydd ym mhob etholaeth hefyd.

Mae Keir Starmer wedi dechrau ei ddiwrnod olaf o ymgyrchu yn Hendy-gwyn ar Daf yn Sir Gaerfyrddin.

Yno cafodd gwmni Vaughan Gething, Prif Weinidog Cymru, a Martha O’Neil, ymgeisydd y Blaid Lafur yn yr etholaeth.

Yr amcan fu’r tri siaradwr yn ei bwysleisio oedd cydweithio rhwng y Senedd a San Steffan er lles pobol yng Nghymru. Mae’r neges yma wedi cael ei hailadrodd dro ar ôl tro yn ystod yr ymgyrch.

Bydd llawer o sylw yn cael ei roi i’r addewid i wella’r berthynas o’r cychwyn cyntaf pe bai Keir Starmer yn fuddugol yn ei ymgyrch i fod yn Brif Weinidog ddydd Gwener.

Mae’r lleoliad yn un arwyddocaol hefyd, yn etholaeth Caerfyrddin, lle mae’r arolygon barn yn gweld brwydr agos iawn rhwng Martha O’Neil ac Ann Davies o Blaid Cymru. Bydd Llafur yn awyddus i drechu Plaid Cymru, yn ogystal â’r Ceidwadwyr, yr etholiad hwn, wrth iddyn nhw geisio ailsefydlu’r naratif fod y Blaid Lafur yng Nghymru yn brwydro i fod yn unedig, yn enwedig ar ôl problemau amlwg Vaughan Gething yn ei fisoedd cyntaf yn Brif Weinidog.

Gallai’r Ceidwadwyr golli pob sedd yng Nghymru, yn ôl yr arolwg barn diwethaf.

Mae pôl piniwn Barn Cymru yn awgrymu ei bod hi’n bosib i Lafur ennill 29 o’r 32 sedd yn y wlad, a’u bod nhw am ennill 40% o’r bleidlais dros y wlad.

Gallai hynny olygu eu bod nhw’n cipio Wrecsam, Sir Fynwy a Bro Morgannwg gan y Torïaid.

Yn ôl yr arolwg, mae’r ras am yr ail safle o ran cyfran y bleidlais yn dynn rhwng y Ceidwadwyr a Reform, gyda’r ddwy blaid ar 16% o’r gefnogaeth yn ôl y sampl diweddaraf o’r boblogaeth.

Mae pedair sedd yn rhy agos i’w darogan, medd y pôl piniwn gan YouGov ar ran ITV Cymru a Phrifysgol Caerdydd. Y seddi hynny yw Ynys Môn a Chaerfyrddin, lle mae hi’n debygol o fod yn dynn rhwng Llafur a Phlaid Cymru; Aberhonddu, Maesyfed a Chwm Tawe rhwng y Democratiaid Rhyddfrydol a’r Ceidwadwyr; a Maldwyn a Glyndŵr rhwng Llafur a’r Ceidwadwyr.

Dangosa’r pôl piniwn fod 14% o’r rhai gafodd eu holi am bleidleisio dros Blaid Cymru, ac mae’r data’n awgrymu mai nhw fydd yn ennill yng Ngheredigion Preseli a Dwyfor Meirionnydd.

Bore da ar y diwrnod cyn yr etholiad!

Beth am ddechrau drwy edrych ar y sefyllfa yng Nghymru wedi’r Etholiad Cyffredinol diwethaf yn 2019.

Mae newid ffiniau etholaethau a chwtogi nifer Aelodau Seneddol Cymru o 40 i 32 yn golygu y bydd hi’n anoddach cymharu, ond fel hyn roedd sefyllfa’r pleidiau yn San Steffan wedi’r etholiad diwethaf:

Llafur: 22 sedd

Y Ceidwadwyr: 14 sedd

Plaid Cymru: 4 sedd

Ar noson yr etholiad nos Iau (Gorffennaf 4) a thrwy’r nos, byddwn ni’n crynhoi’r canlyniadau ac yn dod â’r ymateb diweddaraf i chi o bob cwr o Gymru, yn ogystal â chynnig dadansoddiadau i chi o Gymru a thu hwnt.

Bydd ein tîm ni gyda chi drwy’r cyfan.

Ydych chi wedi cael cip ar ein hadran Etholiad Cyffredinol eto?

Cewch fanylion yr ymgeiswyr, yr etholaethau, y newyddion diweddaraf a mwy.

Etholiad Cyffredinol 2024

Y newyddion diweddaraf o ymgyrch etholiad San Steffan 2024.