Etholiad Senedd 2021 – dydd Gwener

Er bod Llafur wedi dweud eu bod nhw’n disgwyl ennill Llanelli gyda mwyafrif iach, mae ’na awgrym fod hynny wedi newid mymryn. Roedd Helen Mary Jones ar S4C yn swnio ychydig yn fwy gobeithiol nag y mae’r sïon sydd wedi dod i law wedi bod, os nad yn hyderus:

“Mae’n anodd iawn, iawn, iawn gwybod … cael a chael … dydyn ni wir ddim yn gwybod … optimistaidd, ond ddim yn ffyddiog”

Canlyniad yn cael ei ddisgwyl rŵan am 5pm, onid oes ail-gyfrif – dim ond tair awr a hanner yn hwyrach na’r disgwyl. Ond dyna ni, fyddai hi ddim yn etholiad Cymreig heb fod yr amserlen datgan wedi chwalu’n rhacs yn gyflym iawn!

“Bydd y Ceidwadwyr yn falch o gael buddugoliaeth, ond cawn ni weld yn union be mae’n ei olygu i rifyddeg y Senedd pan fyddwn ni’n gweld gweddill y canlyniadau,” meddai Richard Wyn Jones am fuddugoliaeth y Ceidwadwyr yn Nyffryn Clwyd.

“Yn nhermau’r darlun mawr, fyswn i’n dweud fod hwn yn ganlyniad cymharol siomedig i’r Ceidwadwyr.

“Gogwydd gymharol fach i’w sedd darged. Yn nhermau rhagolygon ar gyfer gweddill y Gogledd Ddwyrain, d’yw e ddim be fydden nhw’n obeithio ar gyfer gweddill y Gogledd Ddwyrain.

Er y fuddugoliaeth, fydd hi ddim yn un sy’n rhoi hyder i’r Ceidwadwyr yn ôl Richard Wyn Jones. 

“Talcen mwy caled nag oedden nhw’n ei ddisgwyl,” yn Nyffryn Clwyd.

“Heb Ann Jones roedd yna gyfle mawr i’r Ceidwadwyr chwalu’r fricsen hon, dim ond just gwneud hi wnaethon nhw,” ategodd Betsan Powys.

“D’yw’r fathemateg ddim yn awgrymu y bydd hi’n hawdd iddyn nhw yng ngweddill y Gogledd Ddwyrain.”

Mae Merthyr yn ganlyniad difyr. Ble fyddai pleidlais UKIP yn mynd tybed?

Wel mae gennym ateb i raddau – mae Llafur wedi cryfhau ei sefyllfa yn amlwg gydag ymgyrch gref gan yr aelod Dawn Bowden, tra fod y Ceidwadwyr ar i fyny rhywfaint.

Mae pleidliau llai y dde – oll wedi cael cweir.

Cawn weld os fydd hynny’n dilyn ar y rhestr – ond os yw hi fydd hi’n anodd iddynt gipio seddi rhestr.

Fel sydd wedi’i nodi isod, nodwedd drawiadol o’r canlyniad ym Merthyr oedd y cynnydd trawiadol yn y bleidlais Lafur ers 2016 a’r dirywiad cyfatebol yn y bleidlais i UKIP.

Llwyddiant UKIP ar y bleidlais rhestr gafodd y sylw mwyaf nol yn 2016 wrth i’r blaid lwyddo i sicrhau 7 o seddi rhanbarthol.

Ond ar ben hynny roedd UKIP yn ffactor pwysig yn nifer o’r brwydrau etholaethol hefyd, er na lwyddodd i gipio unrhyw sedd etholaethol. Daeth y blaid yn ail mewn 5 etholaeth yn 2016 (gan gynnwys Merthyr) a llwyddodd i sicrhau dros 10% o’r bleidlais mewn 29 o seddi.

Mae beth sy’n digwydd i’r bleidlais hon yn mwyd i fod yn allweddol mewn amryw o seddi -rhai sy’n dipyn mwy ymylol na Merthyr – ond mae’r dystiolaeth bod Llafur yn medru denu tipyn o’r pleidleisiau hyn yn ôl yn arwydd da iawn i’r blaid.

Mae’r canlyniad yn Nyffryn Clwyd yn awgrymu y gallai’r Ceidwadwyr gael diwrnod da yn yr ardal – eu pleidlais wedi codi 5%. Dim ond 0.5% oedd cynnydd y Blaid Lafur, felly awgrym y tro yma bod mwy o bleidlais UKIP wedi mynd i’r Toriaid.

Ond, ar wahan i 2011, mae hon wedi bod yn sedd agos iawn o’r dechrau.

Wnaeth Golwg rhoi sylw i sedd Dyffryn Clwyd yn ystod yr ymgyrch etholiadol. Oll alla’ i ddweud yw wnaeth pob un ymgeisydd siarad â fi ond am Gareth Davies (penderfynodd e’ beidio â chyfrannu)…

Tybed a wnes i jinx-io’r canlyniad rhywsut?!

Cyfoes

Etholiad 2021: Dyffryn Clwyd

Iolo Jones

Ers dechrau datganoli yn 1999 dim ond un person sydd wedi cynrychioli Dyffryn Clwyd yn y Senedd, sef y Lafurwraig Ann Jones

“Edrych ymlaen at b’nawn ychydig gwell na’r disgwyl… ond mae’n gynnar” medd Mark Drakeford.

Diolch, Mark.

Llywelyn ap Gwilym o fudiad YesCymru ar S4C yn trafod annibyniaeth yn ystod yr ymgyrch.

Dydi YesCymru heb wneud rhyw lawer dros y mis diwethaf – mae’n fudiad amhleidiol. Ond mae’n ddiddorol meddwl, os na fydd y pleidiau sydd o blaid annibyniaeth (yn benodol Plaid Cymru) yn gwneud yn dda heddiw, a fydd newid yn ei strategaeth wleidyddol – os oes un.

Mae canlyniadau etholiadol yn mynd y tu hwnt i’r pleidiau, wedi’r cwbl!

Y Ceidwadwyr wedi cipio Dyffryn Clwyd gyda 41% o’r bleidlais.

Llafur wedi colli Dyffryn Clwyd o drwch blewyn!!

Y Toriaid wedi ennill gyda 10,792

Llafur yn ail gyda 10,426…