Nid fi yw hwn
Er mwyn gadael sylw, mae angen mewngofnodi neu ymuno â’r safle.
gan
Garmon Ceiro
Blog byw Etholiad Senedd 2021 gyda fi, Garmon Ceiro, yng nghwmni Gohebydd Senedd Golwg, Iolo Jones, colofnydd Golwg, Jason Morgan, gohebydd golwg360 Cadi Dafydd… gyda chyfraniadau gan y sylwebyddion gwleidyddol Dafydd Trystan a Huw Prys Jones, Dr Huw Lewis o Brifysgol Aberystwyth, a chyd-sefydlydd Golwg, Dylan Iorwerth.
Dilynwch flog byw dydd Sadwrn am y diweddaraf.
Fel sydd wedi’i nodi isod, nodwedd drawiadol o’r canlyniad ym Merthyr oedd y cynnydd trawiadol yn y bleidlais Lafur ers 2016 a’r dirywiad cyfatebol yn y bleidlais i UKIP.
Llwyddiant UKIP ar y bleidlais rhestr gafodd y sylw mwyaf nol yn 2016 wrth i’r blaid lwyddo i sicrhau 7 o seddi rhanbarthol.
Ond ar ben hynny roedd UKIP yn ffactor pwysig yn nifer o’r brwydrau etholaethol hefyd, er na lwyddodd i gipio unrhyw sedd etholaethol. Daeth y blaid yn ail mewn 5 etholaeth yn 2016 (gan gynnwys Merthyr) a llwyddodd i sicrhau dros 10% o’r bleidlais mewn 29 o seddi.
Mae beth sy’n digwydd i’r bleidlais hon yn mwyd i fod yn allweddol mewn amryw o seddi -rhai sy’n dipyn mwy ymylol na Merthyr – ond mae’r dystiolaeth bod Llafur yn medru denu tipyn o’r pleidleisiau hyn yn ôl yn arwydd da iawn i’r blaid.
Mae’r canlyniad yn Nyffryn Clwyd yn awgrymu y gallai’r Ceidwadwyr gael diwrnod da yn yr ardal – eu pleidlais wedi codi 5%. Dim ond 0.5% oedd cynnydd y Blaid Lafur, felly awgrym y tro yma bod mwy o bleidlais UKIP wedi mynd i’r Toriaid.
Ond, ar wahan i 2011, mae hon wedi bod yn sedd agos iawn o’r dechrau.
Wnaeth Golwg rhoi sylw i sedd Dyffryn Clwyd yn ystod yr ymgyrch etholiadol. Oll alla’ i ddweud yw wnaeth pob un ymgeisydd siarad â fi ond am Gareth Davies (penderfynodd e’ beidio â chyfrannu)…
Tybed a wnes i jinx-io’r canlyniad rhywsut?!
Etholiad 2021: Dyffryn Clwyd
Ers dechrau datganoli yn 1999 dim ond un person sydd wedi cynrychioli Dyffryn Clwyd yn y Senedd, sef y Lafurwraig Ann Jones
“Edrych ymlaen at b’nawn ychydig gwell na’r disgwyl… ond mae’n gynnar” medd Mark Drakeford.
Diolch, Mark.
Llywelyn ap Gwilym o fudiad YesCymru ar S4C yn trafod annibyniaeth yn ystod yr ymgyrch.
Dydi YesCymru heb wneud rhyw lawer dros y mis diwethaf – mae’n fudiad amhleidiol. Ond mae’n ddiddorol meddwl, os na fydd y pleidiau sydd o blaid annibyniaeth (yn benodol Plaid Cymru) yn gwneud yn dda heddiw, a fydd newid yn ei strategaeth wleidyddol – os oes un.
Mae canlyniadau etholiadol yn mynd y tu hwnt i’r pleidiau, wedi’r cwbl!
Y Ceidwadwyr wedi cipio Dyffryn Clwyd gyda 41% o’r bleidlais.
Llafur wedi colli Dyffryn Clwyd o drwch blewyn!!
Y Toriaid wedi ennill gyda 10,792
Llafur yn ail gyda 10,426…
Dydi canlyniad Merthyr ddim o angenrheidrwydd yn arwyddocaol o ran y seddi agos yng ngogledd-ddwyrain Cymru – mae’r ddemograffeg yn wahanol iawn.
Mae etholaethau’r gogledd-ddwyrain yn edrych llawer mwy i gyfeiriad Lloegr…
Yr SNP wedi ennill y gynta o seddi Glasgow – patrwm tebyg, symudiad bach iawn at Lafur ond dim o bwys.
I ategu beth ddywedodd Dylan Iorwerth, yn ôl canlyniad Merthyr o leiaf, mae’r bleidlais UKIP – ac efallai Brexit/Reform UK ers 2016 – wedi dychwelyd at y blaid Lafur.
Y peth arwyddocaol am hyn ydi ei fod i’r gwrthwyneb o’r sefyllfa yn Lloegr, lle mae’n ymddangos fod nifer fawr o bleidleiswyr a drodd oddi wrth Lafur at UKIP a Phlaid Brexit wedi troi at y Ceidwadwyr yn hytrach na’u hen blaid.